Muǵalim bolǵysy kelgen tulǵalar pedagog biliktiliginiń sáıkestigin qashannan bastap rastaıdy
NUR-SULTAN. QazAqparat - 2022 jyldyń 1 qańtarynan bastap muǵalim retinde kásibı qyzmetin júzege asyrýǵa alǵash ret kirisetin tulǵalar pedagog biliktiliginiń sáıkestigin rastaýy tıis. Bul týraly búgin QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.
«Pedagog mártebesi týraly» QR Zańynyń jobasy 19 baptan turady jáne 500 mıllıonnan astam ustaz jumysyna qatysty. Jalpy, zań jobasy 4 baǵytty qamtıdy. Birinshi - ustazdardyń quqyqtaryn keńeıtý jáne ózine tán emes jumystan bosatý, júktemesin azaıtý. Ekinshi - muǵalim qyzmetine qoıatyn talaptardy kúsheıtý. Úshinshi - materıaldyq emes tetikter. Tórtinshi - materıaldyq yntalandyrý«, - dedi QR Parlamenti Májilisiniń jalpy otyrysynda atalǵan zań jobasyn tanystyrǵan mınıstr.
Onyń atap ótýinshe, birinshi baǵytta zań jobasynda pedagogterdiń quqyqtary boıynsha 10 jańa pozıtsııa qarastyrylǵan. Olardyń barlyǵy muǵalimniń jeke damýyna jáne oqý protsesin jetildirýge múmkindik beredi. Muǵalimderdi artyq jumysqa, óziniń fýnktsııasyna kirmeıtin jumysqa tartýǵa, shamadan tys esep berýge, qaǵazbastylyqqa, negizsiz tekserýlerge tyıym salý arqyly júktemeni azaıtý boıynsha jeke normalar da kózdelgen.
»Bul shynynda da búgingi kúni óte ózekti problema. Jýyrdaǵy halyqaralyq TALIS zertteýleriniń kórsetkishterin kórip otyrmyz. Sol zerteýlerge baılanysty jalpy TMD, EYDU memleketterimen salystyrǵanda bizdiń áriptesterimizdiń júktemesi eń kóp. Mysaly EQYU memleketterinde 38 saǵat bolsa, bizde - 48,8 saǵat. Sondyqtan bul norma óte mańyzdy bolyp tur«, - dedi ol.
Sonymen qatar ol zań jobasynda pedagog mártebesin arttyrý, onyń qyzmetine qoıylatyn talaptardy kúshetý de kózdeletindigin aıtty.
»Sondyqtan zań jobasyna sáıkes, 2022 jyldyń 1 qańtarynan bastap muǵalim retinde kásibı qyzmetin júzege asyrýǵa alǵash ret kirisetin tulǵalar pedagog biliktiliginiń sáıkestigin rastaýy tıis. Muǵalimderdiń etıka máselelerine de kóńil aýdarylýda. Sonymen qatar pedagogıkalyq qyzmetke jiberilmeıtin sebepter de keńeıtilip otyr. Ár bilim berý mekemesinde ádep boıynsha keńester ınstıtýty engizilýde«, - dedi Ashat Aımaǵambetov.
Mınıstr materıaldyq emes yntalandyrý tetikteri retinde muǵalimderdiń balalaryna balabaqshalarda birinshi kezekte oryn berý normasy qarastyrylatyndyǵyn aıtty.
»Buǵan qosa «Qazaqstannyń eńbek sińirgen ustazy» memlekettik marapatynyń jańa túri sııaqty birqatar materıaldyq emes yntalandyrý da qarastyrylyp otyr. Áskerı qyzmetti keıinge qaldyrý, aýyldyq jerde jumys isteıtin muǵalimderge ústeme jalaqy, densaýlyq saqtaý, úzdik pedagog, JOO-nyń úzdik oqytýshysy sııaqty barlyq áleýmettik kepildikter de osy zańda saqtaldy«, - dedi ol.
