«Muǵalim balamdy soqqyǵa jyqty»: Óskemende oqýshy denesinen kógergen izder tabylmady
Qala turǵyny №8 arnaıy mektep-ınternatynda 9-synypta oqıtyn qyzyn muǵalimniń uryp-soqqanyn aıtyp, polıtsııaǵa shaǵymdandy. Budan bólek, ol dál sol mektepte bilim alatyn ulynyń mektep aýmaǵynda ustazdardyń qaraýynsyz júrgende qolyn syndyryp alǵanyn jetkizgen.
Osyǵan baılanysty Shyǵys Qazaqstan oblystyq bilim basqarmasy resmı túsinikteme berdi.
«Muǵalimniń qyzdy soqqany rastalmady. Sot-medıtsınalyq saraptama nátıjesinde jasóspirimnen eshqandaı jaraqat tabylmady. Beınebaqylaý kameralarynyń jazbasynan kóringendeı, muǵalim balaǵa eskertý jasady, biraq qyz esh jaýap bermeı, ary qaraı júgirip ketken. Sol kezde pedagog onyń sońyna túsip, burymynan ustady. Al oqýshy jaýap retinde muǵalimniń shashynan ustaǵan», - deıdi basqarma basshysynyń orynbasary Dınara Shaýhına.
Osy jaǵdaıdan keıin muǵalimge qatań sógis berilgen.
Ekinshi oqıǵaǵa qatysty da tekserý júrgizildi. Belgili bolǵandaı, oqýshy doppen oınap júrgen kezde qulap, jaraqat alǵan.
«Mektepke birden jedel járdem qyzmetkerleri shaqyrtyldy. Olar balany qaladaǵy Ana men bala ortalyǵyna jetkizgen. Eshkimniń kinási joq ekenin balanyń ózi de rastady», - deıdi D. Shaýhına.
