Múftııat Mekkege ketken qazaqstandyqtar týraly málimdeme jasady

ASTANA. KAZINFORM – Qazaqstan qajylyq mıssııasy Mekkege otandastarymyzdyń din aman ekenin habarlady. Qajylyq mıssııasynyń quramynda 4 dáriger jáne 16 týroperatordyń árqaısyndaǵy 1 dáriger em-sharamen aınalysyp jatyr. 

Buǵan deıin Mekkedegi aptap ystyqtan birneshe adamnyń qaza tapqany týraly habarlanǵan edi. Qazaqstan qajylarynyń arasynda qaıtys bolǵan eshkim joq.

Mıssııadaǵy dárigerler tobynyń jetekshisi Ardaq Aıtbaıulynyń aıtýynsha, medıtsınalyq ortalyq kómegine 14-16 maýsym kúnderi 703 qajy júgingen. Olardyń qatarynda júrek-qan tamyrlary, joǵary jáne tómen tynys jáne asqazan-ishek aýrýlary, sondaı-aq basqa da (mazol jaraqaty, allergııa, konıýnktıvıt, t.b.) syrqat boıynsha 120 qajy birneshe ret tekserilgen.

«15 maýsymda Muzdalıfada qan qysymy kóterilgen qajyǵa jedel alǵashqy kómek kórsetilip, dárigerdiń baqylaýymen qonaqúıge jóneltildi. 16 maýsymda Mına jazyǵynda tranzıtorlyq ıshemııalyq ustama boıynsha bir qajyǵa alǵashqy medıtsınalyq kómek kórsetilip, statsıonarǵa jatqyzyldy. Jamaratta shaıtanǵa tas laqtyryp kele jatqan jolda qanty tómendep, esinen tanyp jatqan áıel adamǵa tez arada kómek kórsetilip, ol da statsıonarǵa jetkizildi», - dedi Ardaq Aıtbaıuly.

Qazirgi tańda atalǵan naýqastar dárigerlerdiń tolyq baqylaýynda, jaǵdaıy birqalypty. Odan bólek, elden jetkizilgen dári-dármek qory da jetkilikti.

Eske sala ketsek, Mekkege qajylyqqa barǵan 550 adam aptap ystyqtan kóz jumdy.