Múftııat áleýmettik jelidegi ýaǵyzshylardy qalaı qadaǵalaıdy
ASTANA. KAZINFORM – Qazaqstan Musylmandar dinı basqarmasynyń tóraǵasy, Bas múftı Naýryzbaı qajy Taǵanuly Jibek Joly telearnasynyń «Ýáde» baǵdarlamasynda áleýmettik jelide belsendi ımamdar týraly, olar aıtatyn ýaǵyz-nasıhattyń baǵyttary týraly pikirin bildirdi.
Bas múftı áleýmettik jelilerde QMDB akkaýnttary bar ekenin, COVID-19 pandemııasynda meshit esikteri jabylǵanymen, onlaın ýaǵyz-nasıhat toqtamaǵanyn atap ótti. Bul jańa ádister qazir de jalǵasyp keledi jáne oqyrmany kóp ımamdar qatary qalyptasty.
– Múftııatta aqparat bólimi jumys isteıdi, oǵan qosa ýaǵyz-nasıhat bólimi ýaǵyzdardyń taqyryptaryn bekitip, ımamadar arasynda bóledi. Aýyl-aımaqtaǵy ımamdarǵa ýaǵyzdyń mátinin de daıyndap beredi. Ásirese áleýmettik jelide belsendi ımamdarǵa arnaıy baǵyt berilip, qoǵamǵa qajet aqparat nasıhattalady. Keshe ǵana oqý jyly qarsańynda bilimdi bolý qandaı saýapqa keneltetini aıtyldy. Birlik kúni, Otan qorǵaýshylar kúni sekildi árbir memlekettik mereke qarsańynda sharıǵı negizde taqyrpypqa saı ýaǵyzdar aıtylady, - dedi N.Taǵanuly.
Sonymen birge, múfııat tikeleı efırler men podkasttar uıymdastyryp turady. Dinı basqarmaǵa qarasty «Munara TV» telearnasy jumys isteıdi. Ásirese Mońǵolııa men Reseıde turatyn qazaqtar bul arnany jıi kóredi eken.
Naýryzbaı qajy Taǵanuly Musylmandar dinı basqarmasyna memleketten bıýdjet bólinbeıtinin, tek qana demeýshiler men halyqtyń kómegimen jumys istep jatqandaryn da aıtty.
– Ókinishke qaraı, qazaqtyń qundylyqtaryna, dástúrge til tıgizgender de boldy, biz olardy shaqyryp alyp, qatty-qatty eskertý aıttyq. Ózim de «Oqymaǵan taqyrypqa barma» degendi qaıtalap júremin. Qazaq tiline qatysty, anaǵa qatysty birjaqty ýaǵyz aıtqandar boldy. Múftııatqa qarasty ımamdar nemese qatysy joq adamdar da túrli dinı ýaǵyz jasaıdy. Biz olardan basymyzdy alyp qashpaımyz, kerisinshe habarlasyp, qolymyzdan kelgenshe qateleskenderdi shaqyryp, túsindirip, túzetip jatyrmyz, - dedi ol.
Onyń aıtýynsha, áleýmettik jelidegi ýaǵyzdy ártúrli sanattaǵy adamdar tyńdaıtyn bolǵandyqtan, kópshilikti eskere otyryp aıtylýy kerek. Keı ımamnyń tájirıbesi jetispeı, baıqamaı qate jiberip, synǵa qalyp jatady.
– Keıde tanymaldyqtyń ózi adamdy dertke shaldyqtyrady. Birneshe ustazǵa «Pálenbaı oqyrmanym bar dep ózderińizdi dáriptemeńizder, halyq bizden joǵary, biz onyń qyzmetshisimiz» dedim. Qoja Ahmet ıAssaýı aıtqandaı, «Haqqa qyzmet halyqqa qyzmetten bastalady. Al halyqqa qyzmet etý úshin adam topyraq tárizdi qarapaıym bolýy kerek». Sondyqtan kez kelgen ımam, ustaz ýaǵyzda qarapaıymdylyqty kórsetýi kerek, bárin bir negizge súıenip aıtýy kerek, - dedi Naýryzbaı qajy Taǵanuly.
Aıta keteıik, elordada Álemdik jáne dástúrli dinder kóshbasshylarynyń sezi qorytyndylandy. Segizinshi márte uıymdastyrylǵan basqosýda senim ǵana emes, ǵalamdyq keleńsizdikter men adamzat ushyrasatyn qıyndyqtardyń tıegi tarqatyldy. Árbir usynys ózara dostyqqa, dinaralyq yntymaqtastyqqa negizdelgenin kórdik. Kazinform tilshisi ǵalam dinbasylarynyń basyn qosqan jıynda qandaı tujyrym jasalǵanyn tarqatty.