Mýaıtaıdan WMC chempıony Elaman Saıasatov: Maqsatym - barlyq tıtýldy enshileý
ATYRAÝ. QazAqparat - Kásipqoılar arasynda Azııa chempıony atandym. Endigi maqsatym álem chempıony bolý. Bul týraly QazAqparat tilshisine bergen suhbatynda kúni keshe Astanada mýaıtaıdan ótken Azııa chempıonatynda jeńiske jetken Elaman Saıasatov aıtty.
«Mýaıtaı sporty qazirgi ýaqytta álem boıynsha úlken qyzyǵýshylyqqa ıe. Ásirese kásipqoılar arasyndaǵy básekelerge suranys joǵary. Qazaqstanda da bul sport keńinen tanyla bastady. Kásipqoılar arasynda Azııa chempıony atandym. Endigi maqsatym álem chempıony bolý. Jekpe-jekke az ýaqyt qalǵanda burynǵy jaraqattarym syr berip, qıynǵa tústi. Endi mundaı múmkindiktiń berile bermeıtinin oılap, jattyǵýlarymdy qaldyrmadym. Jattyqtyrýshylarymnyń arqasynda jeńiske jettim. Atyraýǵa alǵash bolyp tıtýl alyp kelgenime qýanyshtymyn. Maqsatym - múmkin bolǵan barlyq tıtýldy enshileý», - deıdi Elaman.
Eske salaıyq, 16 mamyr kúni elordada mýaıtaıdan kásipqoılar arasynda «Astana qalasy ákiminiń kýbogy» úshin halyqaralyq týrnır ótti. Keshte Búkilálemdik mýaıtaı keńesiniń (WMC) nusqasy boıynsha kásipqoılar arasyndaǵy Azııa chempıony ataǵy sarapqa salyndy.
51 keli salmaqta WMC Azııa chempıony belbeýi úshin halyqaralyq dárejedegi sport sheberi, atyraýlyq Elaman Saıasatov pen Taıland Koroldiginiń chempıony Kongkamraı Jırapong kezdesti. Taı sportshysy osyǵan deıin 95 kezdesýde jeńiske jetkenin aıta ketý kerek.
20 jastaǵy atyraýlyq sportshy qarsylasynyń tájirıbeli bolǵanyna qaramastan ony nokaýtqa túsirip, jeńisti julyp aldy. Osylaısha, Elaman chempıondyq beldikti beline baılady.
Beldikti QR Mýaıtaı federatsııasynyń prezıdenti Kárim Másimov tabystady.
Aıta keteıik, búgingi tańda Elaman Saıasatov Qazaqstanda ǵana emes, álemdegi eń úzdik sportshylardyń biri. Ol bıylǵy jyly Meksıkada ótken álem birinshiliginde - kúmis, byltyrǵy jyly Polshada ótken Búkilálemdik oıyndarda altyn medal enshilegen bolatyn.
