MTV Video Music Awards 2026: BTS úsh, al Madonna 7 marapatqa ıe boldy
ASTANA. KAZINFORM — MTV Video Music Awards 2026 marapattaý rásiminde BTS toby úsh júldege ıe boldy. Alaıda mýzykanttar saltanatty sharaǵa qatysa almady. BLACKPINK tobynyń múshesi Lısa «Úzdik pop oryndaýshy» atalymynda jeńiske jetse, Madonna birden 7 marapatqa ıe boldy, dep jazady Yonhap.
Marapattaý rásimi Los-Andjelestegi Peacock teatrynda ótti. Madonna keshtiń basty júldegeri atanyp, 7 marapat aldy. Olardyń qatarynda «Jyl ártisi», Sabrına Karpentermen birge oryndaǵan «Bring Your Love» áni úshin «Úzdik birlesken jumys», «Úzdik bı» júldeleri, sondaı-aq úzdik albom, operatorlyq jumys, horeografııa jáne tolyqmetrajdy beınebaıan úshin berilgen marapattar bar.
BTS úsh negizgi marapatqa ıe boldy
BTS úsh atalym boıynsha usynylyp, úsheýinde de jeńiske jetti. Top «Arirang» atty besinshi stýdııalyq albomyna engen «Swim» áni úshin «Jyl áni» jáne «Úzdik K-pop» marapattaryn aldy. Sonymen qatar top «Úzdik top» atandy.
«Jyl áni» atalymynda BTS Netflix-tiń «K-pop: Jyn aýlaýshylar» mýltfılmindegi «Golden» ánin, Madonna men Sabrına Karpenterdiń «Bring Your Love» kompozıtsııasyn jáne Ella Lenglıdiń «Choosin' Texas» ánin basyp ozdy. Bul BTS-tiń «Jyl áni» atalymyndaǵy alǵashqy jeńisi boldy.
BTS músheleri tyǵyz jumys kestesine baılanysty marapattaý rásimine qatysa almady. Júldelerdi alǵannan keıin top ARMY fanattaryna alǵysyn bildirip, «Arirang» albomynyń jetistigin jańa bastamanyń sımvoly dep atady.
— Biz basty marapat — «Jyl áni» atalymyndaǵy «Swim» júldesin mýzykamyzdy jaqsy kóretin barlyq jankúıerlerimizdiń arqasynda aldyq dep esepteımiz. Jeti adamnan quralǵan top retinde sizderge budan da tamasha mýzyka men ónerimizdi usyna beremiz, — dedi top músheleri.
BTS «Úzdik top» atalymynda besinshi ret jeńiske jetti. Buǵan deıin top 2019 jyldan 2022 jylǵa deıin 4 jyl qatarynan osy marapatqa ıe bolǵan. Al «Úzdik K-pop» atalymynda BTS tórtinshi ret jeńiske jetti.
BLACKPINK múshesi Lısa «Dream» áni úshin marapat aldy
BLACKPINK tobynyń múshesi Lısa japon akteri Kentaro Sakagýtıdiń jazǵan «Dream» áni úshin «Úzdik pop oryndaýshy» atalymynda jeńiske jetti. Bul atalymda ol Arıana Grande, Charli XCX, Olıvııa Rodrıgo, Sabrına Karpenter, Teıt Makreı jáne Teılor Svıftpen birge baq synady.
Lısa MTV VMAs tarıhynda osy atalymda jeńiske jetken alǵashqy azııalyq jeke oryndaýshy atandy. Bul onyń marapattaý rásimindegi tórtinshi jeńisi. Buǵan deıin ol 2022, 2024 jáne 2025 jyldary «Úzdik K-pop» atalymynda úsh ret jeńiske jetken.
Marapattaý rásiminde Lısa «SaWaDiKa» atty jańa ánin de oryndady.
Júldeni alǵan kezde ánshi MTV-ge jáne ózi «Lılı» dep ataıtyn jankúıerlerine alǵysyn bildirdi.
BLACKPINK tobynyń taǵy bir múshesi Djennı, Cortis boız-bendi jáne Katseye gerl-bendi de bıylǵy VMAs marapatyna usynyldy. Alaıda olar júldege ıe bola almady.
Ótken jyly BLACKPINK múshesi Roze «Jyl áni» atalymynda jeńiske jetken alǵashqy K-pop oryndaýshysy atandy. Ol Brýno Marspen birge jazǵan «APT» sıngli úshin marapattalǵan.
Aıta keteıik, bıyl BTS «Gremmı» syılyǵyna qatysýdan bas tartqan bolatyn.
