MTV Music Awards syndy álemdik sahnalardy tek qazaq ánimen baǵyndyra alamyz - Dımash Qudaıbergen
ASTANA. QazAqparat - «Slavıan bazary-2015» baıqaýynyń Gran-prı júldesin utyp alǵan Dımash Qudaıbergen álemdik sahnalardy sheteldik ánmen emes, tek qazaqtyń tól mýzykasymen ǵana baǵyndyrýǵa bolady dep esepteıdi.
«Bizdiń elde vokaldy mektep óte myqty, pedagogtarymyzdyń deńgeıi asyp tur. Eger daıyndalsaq, barlyǵyna qol jetkizýge bolady. MTV Music Awards syndy sahnalarda jasyndaı jarqyldaýǵa da múmkindik bar. Osyndaı bıik dárejeli sahnalardy baǵyndyrý qazaq ánshileriniń qolynan keletin dúnıe. Tek qazaqsha án shyrqaý qajet. Meniń oıym osyndaı», - dep atap ótti ánshi búgin Astanada bergen baspasóz máslıhatynda.
Dımash Qudaıbergenniń sózine qaraǵanda, Qazaqstanda aǵylshyn tilinde sheteldik sahnada óner kórsetýdi kózdegen ánshiler qazaq ánderine mán bergeni durys. Sebebi aǵylshyn tilindegi ándermen búginde aǵylshyndyqtardy moıyndatý óte qıyn.
«Aǵylshyn tilindegi ánmen eshkimdi de tańyrqata almaısyń. Barlyǵy Beıonse, Meraııa Kereı sııaqty jezkómeı ánshilerdiń baryn biledi. Olardan asyp túsý óte qıyn. Olardy óz naqyshyńa ózgertseńiz de bolady, degenmen ol sheteldik tyńdarmanǵa qyzyq emes. Tek qazaqsha ánmen, qazaq kolorıtimen barsha álemdi tańqaldyrýǵa bolady. Óıtkeni bizdiń ánder dúnıejúzinde eń keremet mýzykalardyń biri», - deıdi ol.
Este bolsa, jaqynda ǵana Dımash Qudaıbergen «Vıtebsk-2015» XXIV estrada ánderin oryndaýdyń halyqaralyq baıqaýynyń Gran-prıin oljalaǵan bolatyn. Atap ótý kerek, «Vıtebskidegi slavıan bazarynyń» 24 jyldyq tarıhynda qazaqstandyq ánshiler bas júlde túgili birinshi syılyqqa da ıe bola almaǵan.
