MSQ jyl basynan beri klınıkalarǵa qansha qarjy tóledi
NUR-SULTAN. QazAqparat - «Áleýmettik medıtsınalyq saqtandyrý qory» KEAQ jyl basynan beri memlekettik tapsyrys boıynsha kórsetilgen qyzmetter úshin 487 mlrd teńge tóledi. Qarjy kepildendirilgen tegin medıtsınalyq kómek paketi (TMKKK) aıasynda bólindi, dep habarlaıdy QazAqparat.
«2019 jyly 11 shildedegi málimetter boıynsha Qor tarapynan kelisimshart bekitken jetkizýshi kompanııalarǵa 487 mlrd teńge tólendi. Bul kepildendirilgen medıtsınalyq kómek paketi aýqymynda bekitilgen kelisimsharttardyń jalpy somasynyń 54,8 protsenti», - dedi MSQ basqarma tóraǵasynyń orynbasary Botagóz Jaqselekova.
2019 jyly MSQ kepildendirilgen kómek túrlerin kórsetýge nıet bildirgen medıtsına uıymdarymen 889 mlrd teńgeniń kelisimshartyn bekitken bolatyn. Bul ótken jyly bólingen qarjydan 6 protsent artyq.
«Jumys kestege saı júrip jatyr. Bólingen qarajat medıtsına mekemeleriniń operatsııalyq shyǵyndaryn óteýge jetkilikti», - dedi B. Jaqselekova.
Bıyl memlekettik tapsyrysty oryndaýǵa 1416 medıtsına uıymy atsalysyp jatyr. Onyń ishinde 708 jekemenshik klınıka da bar. Aǵymdaǵy jyly olardyń sany 2018 jylmen salystyrǵanda 64-ke artqan. Memleketten tapsyrys alǵan jekemenshik klınıkalar sany jaǵynan Shymkent, Nur-Sultan, Almaty qalalary men Qyzylorda jáne Jambyl oblystary kósh bastap tur.
Esterińizge sala ketsek, MSQ 2018 jyldan bastap TMKKK jáne mindetti áleýmettik medıtsınalyq saqtandyrý (MÁMS) paketteriniń qarjylyq operatory bolyp sanalady jáne halyqqa kórsetiletin medıtsınalyq qyzmetterdi QR Úkimeti bekitken tártip boıynsha satyp alady.
