MSQ emdeý mekemelerin irikteý protsesin avtomattandyrady
ALMATY. QazAqparat - Áleýmettik medıtsınalyq saqtandyrý qory Qarjy mınıstrligimen birlesip halyqqa qyzmet kórsetetin emdeý mekemelerin irikteý protsesin avtomattandyryp jatyr. Bul týraly Almatyda medıtsınalyq saqtandyrý máseleleri jónindegi aımaqtyq shtab otyrysynda «Áleýmettik medıtsınalyq saqtandyrý qory» KEAQ basqarma tóraǵasy Aıbatyr Jumaǵulov málimdedi.
«Qarjylandyrý kólemi artqannan keıin medıtsına uıymdarynan túsetin ótinishter men kelisimsharttar sany da eki esege kóbeıedi. Sondyqtan biz satyp alý protsesin de jetildirip jatyrmyz. Bıylǵy jyldyń úshinshi toqsanynda qyzmet kórsetetin kompanııalar bazasyn jasaý, konkýrsqa qatysýǵa ótinish berý, satyp alý protsedýrasy, jetkizýshilerdi irikteý komıssııalarynyń jumysy da tolyǵymen avtomattandyrylady. Bul jumystyń bári elektrondy satyp alýlar portaly arqyly onlaın rejımde júrgiziledi», - dedi Aıbatyr Jumaǵulov.
Onyń aıtýynsha, memlekettik tapsyrys sheńberinde satyp alynatyn qyzmetterdi emdeý mekemeleri arasynda bóliske salý jumystarynyń nátıjesi densaýlyq saqtaý salasyndaǵy tólem júıelerine jiberiledi. Sodan keıin Qor men jetkizýshiler arasynda kelisimshart bekitiledi. Bul ózgeristerdiń bári de medıtsınalyq qyzmetterdi satyp alý protsesiniń ashyqtyǵyn, tıimdiligin qamtamasyz etpek.
«Qazirdiń ózinde Qorda kelisimsharttar men qosymsha kelisimder avtomatty túrde qalyptastyrý fýnktsııasy iske qosylǵan. Osy tamyz aıynda qujattardyń bir bóligine tsıfrlyq qoltańbanyń kómegimen qol qoıýǵa múmkindik alamyz», dep qorytty MSQ basshysy.
