MSQ elordalyq medıtsına uıymdaryna 84,4 mlrd teńge tóledi
«Áleýmettik medıtsınalyq saqtandyrý qory» KEAQ jyl basynan beri memlekettik tapsyrys boıynsha kórsetilgen qyzmetter úshin 761 mlrd teńge tóledi. Qarjy tegin medıtsınalyq kepildendirilgen kómek kólemi (TMKKK) sheńberinde bólindi.
«2019 jyldyń 25 qarashasyndaǵy málimetter boıynsha, Qordyń Nur-Sultan qalasy boıynsha fılıalymen kelisimshart jasaǵan jetkizýshi kompanııalarǵa 84,4 mlrd teńge tólendi. Bul tegin medıtsınalyq kepildendirilgen kómek kólemi sheńberinde jasalǵan kelisimsharttardyń jalpy somasynyń 81,6 % paıyzyn quraıdy», - dedi «Áleýmettik medıtsınalyq saqtandyrý qory» KEAQ Nur-Sultan qalasy boıynsha fılıalynyń dırektory Nurlybek Qabdyqaparov.
Medıtsınalyq saqtandyrý qorynyń Nur-Sultan qalasy boıynsha fılıalymen kelisimshartqa otyryp, tapsyrys alyp jatqan, sonyń ishinde emhana qyzmetine qyzyǵýshylyq tanytyp otyrǵan jekemenshik klınıkalar sany artyp keledi. Bıylǵy jyly elordalyqtarǵa memlekettik tapsyrys aıasynda medıtsınalyq qyzmet kórsetý úshin Qormen kelisimshart bekitken 106 medıtsınalyq uıymnyń 71-i, ıaǵnı 68,9%-y — jekemenshik.
Jalpy, 2019 jyly kepildendirilgen kómek túrlerin kórsetýge múddeli medıtsına uıymdarymen 103,4 mlrd teńgege kelisimshart jasaldy. 2019 jyly TMKKK qarjylandyrý kólemi 2018 jylmen salystyrǵanda 12,7 %-ǵa artyq.
Esterińizge sala ketsek, MSQ – tegin medıtsınalyq kepildendirilgen kómek kólemi (TMKKK) jáne mindetti áleýmettik medıtsınalyq saqtandyrý (MÁMS) paketteriniń qarjylyq operatory.
Medıtsınalyq saqtandyrý júıesi – medıtsınalyq qyzmet sapasy men onyń qoljetimdiginiń kepili.
