MS-13 bandasynyń múshesi 1335 jylǵa bas bostandyǵynan aıyryldy

ASTANA. KAZINFORM — Salvadorda tanymal Mara Salvatrucha nemese MS-13 bandasynyń 240-tan astam múshesi júzdegen jylǵa bas bostandyǵynan aıyryldy, dep habarlaıdy CBS News.

Ortalyq Amerıka eliniń Bas prokýratýrasy 248 banda múshesi 42 kisi óltirý jáne 42 adam urlaý, sondaı-aq basqa da qylmystar úshin jazalanǵanyn habarlady.

Marvın Abel Ernandes Palasıos esimdi sottalǵan azamat 1335 jylǵa bas bostandyǵynan aıyryldy, al taǵy 10 adam 463 jyldan 958 jylǵa deıin sottaldy. Bas prokýratýra qylmystar 2014 jáne 2022 jyldar aralyǵynda jasalǵanyn málimdedi.

2022 jyldyń naýryz aıynan bastap Salvador prezıdenti Naııb Býkele ordersiz tutqyndaýǵa múmkindik beretin tótenshe jaǵdaı aıasynda qylmystyq toptarǵa qarsy kúres júrgizip keledi.

Resmı málimetter boıynsha, 90 myńnan astam adam ustaldy, al shamamen 8 myń adam kinásiz dep tanylyp, bosatyldy.

Býkeleniń qylmystyq toptarǵa qarsy naýqany eldegi kisi óltirý deńgeıin rekordtyq tómen deńgeıge túsirdi. Alaıda adam quqyqtary uıymdary qaýipsizdik qyzmetteri kúsh qoldandy dep aıyptap otyr.

Salvador úkimetiniń málimeti boıynsha, MS-13 jáne taǵy bir top, Barrio 18, sońǵy úsh onjyldyqta shamamen 200 000 adamnyń ólimine jaýapty boldy. Buryn bul eki top el aýmaǵynyń shamamen 80%-yn baqylaǵan, al Salvador álemdegi eń joǵary kisi óltirý deńgeıine ıe bolǵan.

MS-13 1980 jyldary Los-Anjeleste óz elindegi azamattyq soǵystan qashqan salvadorlyq ımmıgranttardan qurylǵan. Sodan beri qatygez top Gvatemala men Gondýrasta óz yqpalyn kórsetip, aımaqty álemdegi eń qaýipti óńirlerdiń birine aınaldyrdy. 

Buǵan deıin Latyn Amerıkasyndaǵy esirtki kartelderi jáne Amerıka prezıdentiniń esirtki saýdasyna qarsy kúreste nege sonshalyqty sheshýshi ról atqaratyny týraly habarlaǵanbyz.