Mirjaqyp Dýlatulynyń taıjaqy tony kórsetildi – mýzeıdegi biregeı eksponat
ASTANA. KAZINFORM — Ulttyq kıim kúnine oraı Ulttyq mýzeıde arnaıy dóńgelek ústel uıymdastyryldy. Shara barysynda ótken ǵasyrlardan syr shertetin, ata-babalarymyz kıgen shapandar, tondar men bórikter kópshilik nazaryna usynyldy.
Jıynǵa etnograf ári qolónershi Bulbul Kápqyzy da qatysyp, óz qolymen órnektegen ulttyq kıimderin tanystyrdy.
– Búgin ulttyq kıim kúnine oraı mýzeıge qazaq qyzynyń ómirde 1-aq ret kıetin kıimi – sáýkeleni alyp kelip turmyn. Bul sáýkeleni túgeldeı óz qolymmen jasaǵanmyn. Buǵan salynǵan órnek aqqý moıyn. Nege deseńiz, aqqýdyń mahabbatyn, náziktigin, sulýlyǵyn bersin jáne aqqý sekildi erkin bolsyn degen maǵynada tigilgen. Onyń shashjabary, jelegi jáne joly bar. Bul sulama dep aıtylady. Oǵan ádeıi qusqanat órnek saldym. Sebebi qyzymyz uıadan ushqanda qus sııaqty erkin samǵap ushsyn degen maǵynada. Qyz balany jalpy qazaq uzatqanda qyzyl kóılekpen uzatqan. Qyzyl jastyqtyń – qýanyshtyń óńi. Jastyǵymen qoshtasyp, qýanyshymen qaýyshyp jatyr dep qyzyl kóılekpen uzatqan, – deıdi qolónershi.
Etnograf qazaqtyń taǵy bir ulttyq kıimi – shekpen týraly da tyń aqparattarmen bólisti.
– Qazaqta jalpy maýty shekpen, shıdem shekpen, bııazy shekpen jáne maqpal shekpen degen túrleri bar. Shekpendi tek 45 jastan asqan er-azamattar kıgen. Áıel adam kımegen. Túıeniń júninen toqylǵan óte kıeli kıim. Munyń toqylý joly erekshe. Ony saýyttyń ishinen oq ótkizbeıdi dep te kıgen. Óıtkeni, ol tyǵyz toqylady. Ystyqta ystyq ótkizbeıdi, sýyqta sýyq ótkizbeıdi. Saýda jasaǵanda adamdar shekpenniń ústine sý quıyp jiberedi eken. Sol kezde sý kıimniń ishine ótpeıtin kórinedi. Shekpenniń quny da osyǵan saı baǵalanǵan, – deıdi Bulbul Kápqyzy.
Kórmedegi erekshe eksponattardyń biri – Mirjaqyp Dýlatulynyń tony. 1940 jylǵa tıesili bul syrtqy kıim «Taıjaqy» dep atalady.
– Bul bizdiń mýzeıdegi biregeı eksponat. Taıdyń tabıǵı terisinen tigilgen. Árıne, qazir bul tondy qaıta qalpyna keltirý qajet. Biz ol jumystardy aldaǵy ýaqytqa josparlap otyrmyz. Ázirge bul kıim mýzeıimizde arnaıy jaǵdaıda saqtalyp tur, – deıdi Ulttyq mýzeıdiń aǵa ǵylymı qyzmetkeri Baqytgúl Nurǵojına.
Aıta keteıik, keı túrkistandyqtar ulttyq kıimdi jyl on eki aı ústinen tastamaı kıip júr.
