Mirjaqyp Dýlatulynyń 140 jyldyǵyna arnalǵan halyqaralyq marafon-báıge óz máresine jetti
QOSTANAI. KAZINFORM — Keń dalany dúbirge bólegen aıtýly doda máresine jetti. Bul týraly Qostanaı oblysynyń ákimdiginiń baspasóz qyzmeti habarlady.
20 qyrkúıek kúni saltanatty túrde Tobyl-Torǵaı dalasynan bastaý alǵan, ótkenge taǵzym, búginge rýh, bolashaqqa amanat retinde kórnekti aǵartýshy, Alash qaıratkeri Mirjaqyp Dýlatulynyń 140 jyldyǵynyń qurmetine jáne Qazaqstan Halqy Assambleıasynyń 30 jyldyǵyna arnaıy uıymdastyrylǵan Halyqaralyq «Uly dala joryǵy» marafon-báıgesiniń jeńimpazdary marapattaldy.
«Uly dala joryǵy» marafon-báıgesi ulttyq at sportynyń tarıhy men mádenıetin dáripteıdi. Bul tek jarys emes, halyqtyń dástúri. Batyrlyq pen erlikti nasıhattaıtyn erekshe synaq.
Qazaqtyń darhan dalasyn dúbirletken tulparlar báıgesi 2022 jyldan beri ótkizilip keledi.
Bıylǵy marafonǵa barlyǵy 3 memleketten 18 komanda qatysty. Marapattaý rásiminde Qyrǵyzstan, Kabardın-Balqar elinen kelgen sportshylarǵa qoshemet kórsetildi. Elimizdiń namysyn qorǵaý úshin Mańǵystaý, Almaty, Jetisý, Qostanaı, Shyǵys Qazaqstan, Abaı, Aqtóbe, Atyraý, Batys Qazaqstan, Ulytaý sııaqty on oblystan, Astana, Almaty qalalarynan jáne Qazaqstan Halqy Assambleıasynyń «Birlik» komandasy qatysty.
Eleýli sátte «Uly dala joryǵy» marafon-báıgesine qoldaý kórsetken jáne uıymdastyrýǵa uıtqy bolyp júrgen ult rýhanııatynyń jáne ulttyq sport janashyrlary zor qurmetpen sahna tórine shaqyryldy. Olar: Qostanaı oblysynyń ákimi Qumar Aqsaqalov, «AMANAT» partııasynyń atqarýshy hatshysy Dáýlet Káribek, QR Premer-mınıstriniń keńesshisi, «Joryq» at sporty federatsııasy «Qamqorshylar keńesiniń» tóraǵasy Eraly Toǵjanov, Memleket jáne qoǵam qaıratkerleri Dúısen Qaseıinov, Abaı Tasbolat jáne «Joryq» at sporty federatsııasynyń prezıdenti Baqytjan Turlybekov.
Alǵashqy bolyp Qostanaı oblysynyń ákimi Qumar Aqsaqalov quttyqtaý sóz sóıledi.
— Búgin biz erekshe qýanysh pen tolqynysqa toly sáttiń kýási bolyp otyrmyz. Torǵaı óńirinde bastaý alǵan «Uly dala joryǵy» marafon-báıgesi óziniń máresine Arqalyq qalasyna jetti. Bul báıge tek sporttyq doda emes, bul halqymyzdyń tarıhyn dáripteıtin, ulttyq rýhymyzdy jańǵyrtatyn, eldigimizdi aıqyndaıtyn taǵylymdy shara boldy, — dep atap ótti oblys ákimi Qumar Aqsaqalov.
«AMANAT» partııasynyń atqarýshy hatshysy Dáýlet Káribek «Uly dala joryǵy» marafon-báıgesiniń osydan úsh jyl buryn tikeleı Memleket basshysy Qasym-Jomart Toqaevtyń qoldaýymen bastalǵanyn, Torǵaı eli altynshy márte ótkizip otyrǵanyn, osy ýaqyt ishinde marafon-báıge álemge tanymal halyqaralyq jarys deńgeıine kóterilgenin tilge tıek etti.
— Úsh jyldyń aınalasynda bul báıge altynshy márte ótkizilip jatyr. Osy ýaqyt ishinde marafon-báıge álemge tanymal halyqaralyq jarys deńgeıine kóterilip keledi. Osynyń bári Prezıdentimizdiń ulttyq sportty damytýǵa jasap otyrǵan qamqorlyǵynyń, qoldaýynyń arqasy ekenin basa aıtýǵa tıispiz. Búginde Ulttyq sport halqymyzdyń ulttyq tólqujatyna, maqtanyshyna, tipti ómir saltyna aınaldy dese bolady, — dedi Dáýlet Káribek.
Premer-mınıstrdiń keńesshisi Eraly Toǵjanov Tobyl-Torǵaı óńiriniń Ybyraı Altynsarın, Ahmet Baıtursynuly, Mirjaqyp Dýlatuly syndy uly tulǵalardy dúnıege ákelgen qutty meken ekenin, el zııalylary ańsaǵan Táýelsizdikke urpaqtary qol jetkizip otyrǵanyn, búginde qazaq elin álem tanyp, dúnıe júzine máshHúr bolǵanyn lebizine arqaý etti.
— Dúnıe júzinde qazaqtyń týy jelbirep, rýhy asqaqtap tur. Onyń bári eldiń birlikte bolǵanynyń arqasynda. «Birlik» komandasy birinshi ret qatysyp otyr. Ony Assambleıanyń 30 jyldyǵymen baılanystyryp otyrmyz. Táýelsizdiktiń tuǵyry — birlik. Birligi bar el ǵana turaqty damıdy. Turaqtylyq bar jerge ǵana halyq senim artady. Senim bolsa, ınvestıtsııa keledi, halyq turaqtaıdy. Osyndaı birligi jarasqan elde úlken toıdyń kýási bolyp jatyrmyz, — dedi Eraly Toǵjanov.
Jarys nátıjesine toqtalar bolsaq, birinshi oryndy Qyrǵyzstan komandasy jeńip aldy. Ekinshi oryn Aqtóbe oblysynyń enshisinde. Úshinshi oryndy Qostanaı oblysynyń komandasy qanjyǵalady. Tórtinshi, besinshi oryn alǵan komandalarǵa da syı-sııapat kórsetildi. Oblys ákimi Qumar Aqsaqalov júldegerlerdi quttyqtap, keler jyly Arqalyq qalasynyń 70 jyldyq mereıtoıynyń qurmetine jarysty jalǵastyrýdy usyndy.
Aıta ketelik Qostanaıda «Uly dala joryǵy» marafon-báıgesi ótip jatqany týraly jazǵan edik.