Mozambıkte sý tasqyny saldarynan 60-tan astam adam qaza tapty
ASTANA. QazAqparat - Sońǵy birneshe kún ishinde Mozambıktiń ortalyq jáne soltústik bólikterinde bolǵan sý tasqyny saldarynan 66 adam qaza tapty. Bul jaıly sársenbi kúni France-Presse agenttigi habarlady.
«Sý tasqyny saldarynan 66 adam qaza tapty. Bılik tolassyz jaýyn men beısenbi nemese juma kúnderi elge jetýi yqtımal Idaı tropıkalyq daýylynyń jaqyndaýyna baılanysty qaýiptiliktiń «qyzyl» rejimin engizdi», - dep málimdedi Mozambık úkimetiniń resmı ókili Ana Komonoa.
Bıliktiń málimetinshe, tabıǵı apat kezinde 6 myńǵa jýyq úı men 100 myń gektar aýyl sharýashylyǵy maqsatynda paıdalanylatyn jer alqabyn sý shaıyp ketken, 140 myń adam zardap shekti. Bolǵan oqıǵaǵa baılanysty bılik Zambezııa jáne Tete provıntsııalarynda turǵyndardy ornalastyrýǵa arnalǵan 16 ortalyq ashqan. Úkimet sondaı-aq, sý tasqynynan zardap shegý qaýpi bar jaqyn mańdaǵy aýdan turǵyndaryn qaýipsiz aımaqtarǵa kóshirýdi buıyrdy.
