Mozambıkte fýtbolshy qoltyraýynnyń jemtigine aınaldy
ASTANA. QazAqparat - Mozambıktiń jas fýtbolshysy Estevao Alberto Jıno qoltyraýynnyń qurbany boldy.
Bul týraly ol oınaǵan «Atletıko Mıneıro de Tet» klýbynyń Facebooktegi resmı saıtynda jazyldy.
«Biz oıynshymyz, dosymyz, qorǵanysymyzdyń myqty býyny, fýtboldaǵy bolashaǵy jarqyn, nebári 19 jastaǵy Estevao Alberto Jınonyń ólimine qatty qaıǵyrýdamyz. Keshe ol Zambezı ózeni jaǵalaýynda qoltyraýynnyń qurbanyna aınaldy»,-delingen habarlamada.
Klýbtyń menedjeri Edı Karvalonyń sózin keltirgen 101greatgoals.com portalynyń jazýynsha, qoltyraýyn ózennen atyp shyǵyp oıynshyny tistegen kúıi sýǵa alyp ketken. Sol kezde qatty aıqaıdy estigen janyndaǵy eki dosy qatty qoryqqandyqtan eshnárse isteı almaǵan. Qoltyraýynnyń uzyndyǵy bes metrden asady.
