MÓZ-ge munaıdy jetkizetin deldaldardyń sanyn qysqartý qajet - depýtat Sh. Ótemisov

ASTANA. QazAqparat - Munaı ónimderiniń tutynýshylarǵa jetkendegi baǵasyn tómendetý úshin MÓZ-derge munaı ákeletinderdiń qataryn bir deldalǵa deıin qysqartý qajet.

Bul týraly búgin QR Parlamenti Májilisindegi parlamenttik tyńdaýda baıandama jasaǵan depýtat Shavhat Ótemisov málim etti.

«Munaı óńdeý zaýyttaryna munaı jetkizýshilerdiń teń dárejedegi qoljetimdigi máselesi tyńǵylyqty zertteýdi qajet etedi. MÓZ-derge munaıdyń basym bóligi «Petrosan» JShS, «QazMunaıGaz-Qaıta óńdeý Marketıng» AQ, «Petroleum Operaiting» JShS, «Saýts-Oıl» JShS jáne «Litasko SA» kompanııasymen jetkiziledi. Atalǵan tasymaldaýshylarmen munaıdy qaıta óńdeýge jetkizý kólemi óńdeýdiń jalpy deńgeıinde 86 paıyzdy qurap otyr. Sonymen qatar olar munaı óńdeý zaýttarynan ónimdi negizgi qabyldaýshy retinde de basym úlesti qamtyp jatyr»,-dedi depýtat.

Onyń sózine qaraǵanda, osy jetkizýshilerdiń deldaldary máselesi ashyq emes jáne zańnamalyq turǵyda rettelmegen. Sondyqtan da munaıdy jetkizý tizbeginde deldaldardyń sanyn zańnamamen aıqyndaý qajettilik týdyrýda, ıaǵnı jer qoınaýyn paıdalanýshydan bastap MÓZ-ge deıin tasymaldaý tizbegi retteleýi qajet. Bul turǵyda ol tutynýshyǵa jetetin munaı ónimderiniń baǵasyn tómendetý úshin bir ǵana deldaldy qaldyrý usynysyn alǵa tartty.