Moıynqumda jolda buzylyp qalǵan avtobýstyń 52 jolaýshysy qutqaryldy
MOIYNQUM. QazAqparat - Jambyl oblysynyń Moıynqum aýdanynda buzylyp, jolda qalyp qoıǵan avtobýstyń jolaýshylary qutqaryldy, dep habarlaıdy QazAqparat.
1 maýsym saǵat 15.50-de 112 nómirine bir jolaýshy habarlasyp, Moıynqum aýdany «Almaty-Ekaterınbýrg» tasjolynyń 418-shaqyrymynda (Myńaral aýylynan 8 shaqyrym jerde) avtobýs buzylǵanyn aıtqan. «Setra» avtobýsy «Shymkent-Nur-Sultan» baǵyty boıynsha kele jatqan. Júrgizýshi - Shymkent qalasynyń turǵyny. Jolaýshylar avtobýsynyń aldyńǵy 2 dóńgelegi tesilgen.
Avtobýs salonynda 52 jolaýshy bolǵan, onyń ekeýi - bala. Barlyǵy - Qazaqstan Respýblıkasynyń azamattary. Bul týraly Jambyl oblystyq tótenshe jaǵdaılar departamentiniń baspasóz qyzmeti habarlady.
«Oqıǵa ornyna «Shyǵanaq» shuǵyl áreket etý brıgadasy, Moıynqum aýdanynyń TJB qyzmetkerleri, jergilikti polıtsııa qyzmeti jáne jergilikti atqarýshy organdardan barlyǵy 7 qyzmetker, 3 tehnıka jiberildi. Moıynqum aýdanynyń TJB qyzmetkerleri jergilikti atqarýshy organdarmen birlesip, oqıǵa ornyna aýyz sý jetkizdi. JPQ qyzmetkerleri 27 jolaýshyny Nur-Sultan qalasyna jolaı bara jatqan kólikterge salyp jibergen. Al, «Shyǵanaq» shuǵyl áreket etý brıgadasy avtobýs jolaýshylaryna medıtsınalyq kómek kórsetti. Zardap shekkender men qaza bolǵandar joq» delingen vedomstvo habarlamasynda.
Avtobýs qosalqy shına jetkizilgennen keıin, saǵat 19.50-de qalǵan 25 jolaýshymen jolǵa attandy.
