Moıynqumda zańsyz ań aýlaǵan 9 adam ustalyp, 8 qarý tárkilendi
TARAZ. QazAqparat - Jambyl oblysy, Moıynqum aýdanynda zańsyz ań aýlaǵan 9 adam ustalyp, 8 qarý tárkilendi, dep habarlaıdy QazAqparat.
Bul azamattardy oblystyq tabıǵı resýrstar jáne tabıǵat paıdalanýdy retteý basqarmasy janynan qurylǵan «Janýarlar álemin qorǵaý boıynsha mamandandyrylǵan jedel qyzmet» mamandary anyqtaǵan.
Moıynqum aýdanyndaǵy «Andasaı» qoryǵyna jasalǵan reıdtik is-shara barysynda 6 quqyq buzýshylyq anyqtalyp, ustalǵan 9 adamnan 8 qarý tárkilengen.
«Brakonerlikpen aınalysqan azamattar boıynsha barlyq málimetter aýdandyq ishki ister bólimine joldandy. Ruqsat etilmegen aýmaqta ań aýlaǵandardy 70 AEK, ıaǵnı 160-170 myń teńge kóleminde aıyppul kútip tur. Budan bólek, oblysta sońǵy 2 aıda brakonerlik baǵyttaǵy 17 quqyq buzýshylyq anyqtalyp otyr» delingen habarlamada.
Eske sala keteıik, Jambyl oblysy aýmaǵynda ań atýǵa tyıym salynǵan 4 tabıǵı qoryq bar. Onyń ekeýi - respýblıkalyq, qalǵan ekeýi - jergilikti menshikte.
Ǵıbrat Sembaı
