Moıynqumda óz betinshe altyn qazbaq bolǵan azamat ustaldy
TARAZ. QazAqparat - Jambyl oblysy Moıynqum aýdanynda jarylǵysh zatty zańsyz tasymaldaǵan azamat quryqtaldy. Atalǵan oqıǵa arnaıy reıdtik is-shara kezinde anyqtalǵan, dep habarlaıdy QazAqparat.
Bul týraly oblystyq polıtsııa departamentiniń baspasóz qyzmeti málimdedi.
«15 aqpan kúni reıd kezinde Birlik - Moıynqum-Ulanbel avtojolynyń 98-shaqyrymynda «Toyota Land Cruiser 80» avtokóligi toqtatyldy. Moıynqum aýylynyń 38 jastaǵy turǵynynyń kóligin tekserý kezinde bagajynan 15 paketke salynǵan «ammonıt» jarylǵysh zaty jáne 17 kapsýla men alty orama sym tabylyp, tárkilendi», - delingen vedomstvo taratqan habarlamada.
Ustalǵan azamattyń aıtýynsha, jarylǵysh zatty ol Ulanbel aýylynan 300 shaqyrym jerdegi qaraýsyz qalǵan áskerı ǵımarattyń ishinen taýyp alǵan. Bul zatty ol Moıynqum qoınaýynan altyn kenin óndirý kezinde jarylys jasaý úshin paıdalanbaq bolǵan.
Aıypty óz kinásin tolyq moıyndap, jarylǵysh zattardy satyp alýǵa jáne tasymaldaýǵa zańmen tyıym salynǵanynan habardar ekenin jetkizdi. Búginde atalǵan fakti boıynsha sot jarylys-tehnıkalyq saraptamasy taǵaıyndalǵan. QR QK 287-baby 3-bóligi boıynsha sotqa deıingi tergeý bastalǵan.
Aıta keteıik, atalǵan bap boıynsha bes jylǵa deıin bas bostandyǵynan aıyrý jazasy qarastyrylǵan.
