Moıynqumda 34 myń gektar alqapty sharpyǵan órtti 4 kúnnen beri sóndire almaı jatyr
MOIYNQUM. QazAqparat - Jambyl oblysy Moıynqum aýdany Qarabóget aýylynan 50 shaqyrym qashyqtyqta Moıynqum orman jáne janýarlar dúnıesin qorǵaý mekemesiniń aýmaǵynda qumdy jerde qurǵaq shóp pen sekseýil janyp jatyr. Órt sóndirýshiler osymen tórtinshi kún tilsiz jaýmen arpalysýda, dep habarlaıdy QazAqparat tótenshe jaǵdaılar komıtetine silteme jasap.
Órtti sóndirýge TJD, «Moıynqum, Baızaq, Merki, Qosqudyq, Qordaı jáne Jýaly orman jáne janýarlar dúnıesin qorǵaý mekemeleri» KMM, Moıynqum aýdanynyń erikti órt sóndirý qurylymynan 233 adam jáne 50 tehnıka, «Qazavıaormankúzeti» RMK MI-2 tikushaǵy jumyldyryldy.
21 shilde túndegi jaǵdaı boıynsha órttiń aýmaǵy 34 myń gektarǵa jetti. Eldi mekenderge qaýip joq. Barlyq kúsh-quraldar qaraýyldaý jumysyn júrgizýde. Órt ornynda ekpini sekýndyna 10 metrge jetetin jel soǵyp tur, aýa temperatýrasy - +36 gradýs.
Eske sala keteıik, biz buǵan deıin Moıymqumdaǵy órt tikushaqpen sóndirilip jatqanyn habarlaǵan bolatynbyz.
Aıta keteıik, ótken táýlikte 33 tabıǵı órt oqıǵasy tirkeldi. Shyǵys Qazaqstan, Jambyl, Qaraǵandy jáne Túrkistan oblystaryndaǵy 13 tabıǵı órt TJK baqylaýynda, onda órtterdi joıý boıynsha sharalar qabyldanýda.
Budan basqa, ótken táýlikte Aqtóbe, Shyǵys Qazaqstan, Jambyl, Batys Qazaqstan, Qaraǵandy, Qostanaı Pavlodar, Soltústik Qazaqstan oblystaryndaǵy tabıǵı órtter joıyldy. Atalǵan óńirlerde ot sharpyǵan aýmaqtyń jalpy aýdany 403 gektardy qurady.
