Moıynqumda 10 myń gektar alqapty sharpyǵan órtti tikushaqpen sóndirip jatyr
TARAZ. QazAqparat - Elimizde sońǵy kúnderdegi aptap ystyqqa baılanysty dala órti jıiledi. 19 shilde kúni 31 tabıǵı órt oqıǵasy tirkelgen, dep habarlaıdy QazAqparat tótenshe jaǵdaılar komıtetine silteme jasap.
Aqtóbe, Jambyl, Shyǵys Qazaqstan, Qaraǵandy jáne Qostanaı oblystarynda oryn alǵan 19 tabıǵı órt komıtet baqylaýynda. Ony mamandar sóndirip jatyr.
Onyń ishinde eń iri eki tabıǵı órt Jambyl oblysynda 18 myń ga alqapty sharpydy. Eldi mekenderge qaýip tóngen joq. Órtti sóndirýge aýa raıy kedergi bolyp otyr: +38 gradýs, jel 17 m/s.
18 shilde saǵat 9:36-da Moıynqum aýdanynyń Moıynqum aýylynan 180 shaqyrymda, Qarabóget aýylynan 50 shaqyrym qashyqtyqta Orman jáne janýarlar dúnıesin qorǵaý jónindegi Moıynqum mekemesi aýmaǵynda qumdy jerde 10 myń ga aýmaqta qurǵaq shóp pen sekseýil janǵan.
Órtti aýyzdyqtaýǵa 219 adam, 51 tehnıka jáne 1 tikushaq jumyldyryldy.
19 shilde saǵat 13:00-de T.Rysqulov aýdany Qulan aýylynan 100 shaqyrym jerde, Lýgovoı orman sharýashylyǵynyń aýmaǵynda, qumdy jerde qurǵaq shóptiń janýy oryn alyp, Merke aýdany Saryqoba ormanshylyǵy aýmaǵyna ótip, aldyn ala málimet boıynsha 8 myń ga aýmaqta órt shyqty.
Saǵat 10:20-da órt aýyzdyqtaldy. Ony sóndirýge 177 adam men 35 tehnıka tartyldy.
Sonymen qatar, ótken táýlikte Almaty, Aqtóbe, Batys Qazaqstan, Jambyl, Qaraǵandy, Qostanaı, Pavlodar oblystarynda qurǵaq shóp janǵan.
