Moıynqum aýdanynda kópbalaly otbasylarǵa arnalǵan jataqhana paıdalanýǵa berildi
TARAZ. QazAqparat – Jambyl oblysy Moıynqum aýdanynda kópbalaly, úısiz otbasylarǵa arnalǵan 12 páterli jataqhana qoldanysqa berildi, dep habarlaıdy QazAqparat tilshisi.
Moıynqum aýdanynda kópbalaly, úı kezeginde turǵan otbasylar únemi aýdan ákiminiń qabyldaýynda bolyp, turǵyn úı máselesin sheship berýdi suraǵan bolatyn. Osyǵan oraı aýdan ákiminiń bastamasymen tıisti qarjy bólinip, aǵymdaǵy jyldyń basynda №8 Moıynqum kolledjiniń bos qalǵan jataqhanasy kúrdeli jóndeýden ótti. Talaı jyl qaraýsyz, jóndeýsiz turǵan 4 qabatty jataqhanaǵa aýdan bıýdjetinen 27 mln. teńge bólinip, 1 jáne 2 qabattary qaıta jańǵyrtylyp, shatyry aýystyrylyp, ishine ortalyqtandyrylǵan jylytý júıeleri, aýyz sý men sanıtarlyq torap júrgizilgen.
12 páterli jataqhanaǵa kópbalaly, az qamtylǵan úı kezegindegi otbasylar ıe boldy. Páter kiltterin tapsyrǵan aýdan ákimi Máden Musaevtyń, qýanysh ıelerin qonys toıymen quttyqtady. Óz kezeginde baspanaly bolǵan kópbalaly analar da óz áserimen bólisti.
«Biz joldasym ekeýmiz 5 bala tárbıelep otyrmyz. Balalarymnyń barlyǵy mektep jasynda. Joldasym da, ózim de shashtaraz bolyp jumys isteımiz. Talaı jyldan beri baspana jaldap keldik. Endi mine búgin qýanyshymyz qoınymyzǵa syımaı otyrǵan jaıymyz bar. Alǵashynda kópbalaly úısiz otbasylarǵa berilip jatqan osy úı tiziminde bar ekenimdi de bilmedim. Bala shaǵamyzben páterden páterge kóship ábden sharshaǵan edik. Basqa januıalarmen birge meni de kilt alýǵa shaqyrǵanda sener senbesimdi bilmeı, qatty qýandyq. Aýdan, oblys basshylyǵyna alǵysymdy aıtamyn»,-deıdi Aıgúl Ermýratova.
