Moınynda problemalyq qaryzy barlardyń 96 paıyzy sottan tys bankrottyq rásimdeýi múmkin - Qarjy mınıstrligi

ASTANA. QazAqparat – Moınynda problemalyq boryshy bar qazaqstandyqtardyń 96 paıyzy sottan tys bankrottyq sanatyna jatqyzylýy múmkin. Bul týraly Qarjy vıtse-mınıstri Erjan Birjanov ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

«Jeke tulǵalardyń bankrottyǵy týraly zań Májilis qaraýyna jiberilgen. Qujattyń bastapqy tujyrymdamasy boıynsha, biz úsh tásilin daıyndadyq. Birinshi tásil – sottan tys bankrottyq rásimi. Ol úshin azamattyń bankterdiń, mıkroqarjy uıymdary men kollektorlardyń aldyndaǵy bereshegi 12 aıdan artyq ótelmegen bolýy kerek. Bul jerde boryshtyń mólsheri 4,9 mln teńgeden aspaýy qajet, ıaǵnı 1600 aılyq eseptik kórsetkishten artyq bolmaýy kerek», - dedi vıtse-mınıstr.

Sottan tys bankrottyq rásimdeýshilerdiń áleýmettik jaǵdaıy da eskeriledi.

«Ekinshi bir talap – resmı kirisi joq bolýy kerek nemese tabysy jeke basy men asyraýyndaǵy adamdardyń sanyna shaqqanda eń tómengi kúnkóris mólsherinen, ıaǵnı 36 018 teńgeden aspaýy shart. Bul jaǵdaıda boryshkerlerdiń múlki bolmaýy kerek jáne qaryzdar boıynsha bankten esep aıyrysý rásimin júrgizý qajet. Sottan tys bankrottyq tek bankterdiń, mıkroqajylyq uıymdar men kollektorlyq agenttikterdiń aldynda boryshy bar adamdarǵa ǵana qoldanylýy múmkin. Qazirgi tańda problemalyq qaryzy bar adamdardyń 96 paıyzy osy sanatqa túsýi múmkin. Sebebi, kóbi kepilsiz kredıt alǵan, ıaǵnı tutyný nesıesi deımiz ǵoı, soǵan ushyraǵan azamattar qazirgi tańda bul protsedýra arqyly ótýi múmkin», - dedi Erjan Birjanov.