Moınynda 700 teńge qaryzy bar Qazaqstan azamattary shetelge shyǵa almaıdy
ASTANA. QazAqparat - Budan bylaı memleketke 700 teńge qaryzy bar azamattarǵa shetelge shyǵýǵa tyıym salynady. Bul týraly Astana qalalyq Avıatsııalyq transport prokýratýrasynyń baspasóz qyzmeti habarlady.
Vedomstvonyń málimetinshe, sońǵy ýaqyttarda el azamattaryna shetelge shyǵýǵa jol bermeý sharalary jıilegen. Bul eń aldymen 2013 jyldyń maýsymynda «Sot oryndaýshylarynyń oryndaýshylyq óndirisi jáne dárejesi týraly» Zańyna engizilgen birqatar ózgertýler men tolyqtyrýlarǵa baılanysty. Azamattartar bul máselege shetelge ushatyn bıletterin, demalatyn joldamalaryn satyp alyp, baratyn elindegi qonaq úıge tapsyrys berip qoıǵan soń, shekaralyq baqylaýdan ótip jatqan kezinde tap keledi. Sondyqtan, prokýratýradaǵylardyń atap ótýinshe, shetelderde keńinen qoldanylatyn bul tásil boryshkerlerdiń qaryzdaryn der kezinde ótep otyrýyna zor yqpal etedi. Shetelge ushýǵa tyıym salýdyń eń basty sebebi azamattyń moınyndaǵy qaryz, aıyppul, atqarýshy qujattardy oryndamaý sııaqty jaǵdaılar. Sondyqtan, memleket aldynda qaryzy nemese aıyppuly bar, ıa bolmasa sotqa júgingen jeke tulǵaǵa boryshker azamattar shetelge ushar aldynda durystap oılanǵandary jón. «Bul retti tek alıment nemese jol aıyppuldaryn tólemegen adamdar ǵana emes, qalanyń kommýnaldyq qyzmetterine de qaryzy bar tulǵalar boryshker dep tanylady. 700 teńgeden bastap qaryzy bar adamdar, eger olardy sot arqyly óndirý sheshimi shyǵarylǵan bolsa, mundaı tizimge engiziledi», - delingen habarlamada. Aıta keteıik, shetelge shyǵý múmkindigi shshektelgender tizimine azamat sot oryndaýshysynyń qaýlysy boıynsha ǵana kirgiziledi. Al sot oryndaýshysynyń qaýlysy óz kezeginde sot arqyly sanktsııalanýy tıis. «Sot qaýlyny sanktsııalaǵannan keıin sizge onyń kóshirmesi beriledi, sonymen qatar QR UQK Shekara qyzmeti de bir kóshirmesin alady. Siz shetelge ushar kezde dál osy qyzmettiń qyzmetkerleri ortaq bazada qaryzyńyz tólendi degen belgi shyqpaıynsha, sizdi shekaradan ótkizbeıdi», - delingen habarlamada.
