Moınaq GES-iniń qurylysy alańynan 100-den astam altyn buıym tabyldy
ALMATY. Qyrkúıektiń 27-si. QazAqparat /Erbol Azanbek/ - Moınaq GES-i salynyp jatqan aýmaqta júrgizilgen arheologııalyq zertteý jumystarynyń nátıjesinde júzden astam zergerlik altyn buıymdar tabyldy.
«Arheologııalyq zertteý jumystary «Moınaq GES-i» AQ-nyń basshylyǵynyń tapsyrysymen «Qazaqstannyń tarıhı muralaryn saqtaý jónindegi» zańyna sáıkes qurylys aýmaǵyn zertteý maqsatynda bastalǵan bolatyn. Sodan bergi ýaqytta sý qoımasy astynda qalatyn jerden 58 eskertkish zerttelip, qazylǵan. Nátıjesinde Moınaq GES-i ornalasqan Jetisýdyń Raıymbek aýdany aýmaǵynda Qola dáýiri, óte erte Saq, Túrki, Ǵun zamany, Bıǵazy-Dándibaı, Nura mádenıetine qatysty buıymdar tabylǵan.
Bulardyń ishindegi eń erekshesi erte saq dáýirine qatysty buıymdar. Bul elimizdiń basqa aýmaǵynda kezdespeıdi. Sonymen qatar qazbalar nátıjesinde Begazy-Dándibaı mádenıetine sáıkes keletin mádenıet tek Saryarqada emes Jetisýda da bolatynyn dáleldeıtin buıymdar, taǵy bir úlken jańalyq - Ǵun dáýiriniń eskertkishteri tabylǵan. «Ár tarıhı kezeń belgileriniń bir aýmaqtan tabylýy óte erekshe, sırek jaǵdaı. Sondyqtan aldaǵy ýaqytta aýdan aýmaǵynyń basqa jerlerine de zertteý júrgizilýi tıis» deıdi qazba jumystaryn júrgizgen «Qazarheologııa» JShS «Moınaq GES-i» arheologııalyq ekspedıtsııasynyń bastyǵy Juman Smaılov.
Buıymdardyń jalpy sany 100-den astam. Bulardyń ishinde atymen jerlengen saq jaýyngeri, at buıymdary, ertoqym, aýyzdyq, úzeńgiler, júgen, sadaqtyń oqtary, qumyralar, túrli ydystar bar. Basym bóligi altynnan jasalǵan. Ekspedıtsııa basshysynyń aıtýynsha, aldaǵy ýaqytta jádigerler týraly albom shyǵarylyp, barlyq buıymdar Moınaq GES-iniń murajaıynan oryn alatyn bolady.
