Moıynty-Shyǵanaq ýchaskesinde tórt temirjolshy qaza tapty

ASTANA. KAZINFORM – Búgin saǵat 17:15-te Moıynty-Shyǵanaq ýchaskesiniń Sheshenqara–Qarajanǵyl aralyǵynda iri temirjol apaty boldy, dep habarlaıdy «Qazaqstan temir joly» UK» AQ baspasóz qyzmeti.

Aldyn ala málimetke sáıkes, baǵyt boıymen kele jatqan júk poıyzy mashınısi joldaǵy temirjolshylardy baıqap, shuǵyl tejeý qoldanǵan. Ol sátte Saryshaǵan stantsııasynyń jol jóndeý brıgadasy relsti aýystyrý boıynsha josparly jumystar júrgizip jatqan.

- Alaıda qabyldanǵan barlyq qaýipsizdik sharalaryna qaramastan, apatty boldyrmaý múmkin bolmady. Tórt jumysshy alǵan jaraqattarynan oqıǵa ornynda kóz jumdy, - delingen aqparatta.

Oqıǵanyń sebepteri men tolyq mán-jaıyn anyqtaý úshin QTJ Basqarma tóraǵasynyń tapsyrmasymen arnaıy komıssııa quryldy. Komıssııany ulttyq kompanııanyń bas ınjeneri basqarady. Onyń quramyna «QTJ - Júk tasymaly» JShS jáne Magıstraldyq jeli dırektsııasynyń basshylary kirgen.

Komıssııa músheleri dereý oqıǵa ornyna baryp, tergeý jumystaryn bastap ketti.

- Qazaqstan temir joly» ulttyq kompanııasy qaza tapqan qyzmetkerlerdiń otbasylary men jaqyndaryna qaıǵyryp kóńil aıtady, - delingen resmı habarlamada.

Aıta keteıik, Almatyda er adam temirjol stantsııasy mańynda ózine qol salmaq boldy.