Moıynty – Qyzyljar temirjol jelisindegi joldardyń túıisýi aıaqtaldy
ASTANA. KAZINFORM - Moıynty – Qyzyljar jelisiniń qurylysynda temirjol joldarynyń túıisýi aıaqtaldy. Bul – Qazaqstandaǵy eń iri ınfraqurylymdyq jobalardyń birin júzege asyrýdaǵy mańyzdy kezeń, dep habarlaıdy Úkimettiń baspasóz qyzmeti.
Jumystar Memleket basshysynyń tapsyrmasy boıynsha júrgizilip keledi jáne elimizdiń kólik-logıstıkalyq áleýetin nyǵaıtýǵa, halyqaralyq kólik baǵyttaryn keńeıtýge jáne eksporttyq tasymaldar kólemin arttyrýǵa baǵyttalǵan.
Jańa temirjol jelisiniń qurylysy joǵary qarqynmen jáne bekitilgen kestege sáıkes júrgizilip keledi. Búginde nysanda 2 myńǵa jýyq maman jáne 700-den astam tehnıka jumyldyrylǵan.
Jumystardy oryndaý barysynda kúrdeli ýchaskelerdegi qurylys protsesin tıimdi uıymdastyrýǵa múmkindik beretin zamanaýı tehnologııalyq sheshimder qoldanylyp jatyr.
Atap aıtqanda, kópir qurylystarynda temirjol joly aınalma jelilerdi qoldaný arqyly tóselýde. Bul tásil jumystardyń úzdiksiz júrgizilýin qamtamasyz etip, belgilengen merzimderdi saqtaýǵa múmkindik beredi.
Uzyndyǵy 323,3 shaqyrym bolatyn jańa temirjol jelisi Ulytaý jáne Qaraǵandy oblystarynyń aýmaǵy arqyly ótedi. Paıdalanýǵa berilgennen keıin ol Transkaspıı halyqaralyq kólik baǵytynyń (Orta dálizdiń) mańyzdy býynyna aınalyp, óńirlerdiń kólik baılanysyn nyǵaıtyp, júk tasymalynyń tıimdiligin arttyrady dep kútilip otyr.
-Óz kezeginde, jobany júzege asyrý júk tasymaly baǵytyn 149 shaqyrymǵa qysqartýǵa, Moıynty – Jaryq temirjol ýchaskesine túsetin júktemeni azaıtýǵa, konteınerlik poıyzdardyń qozǵalys jyldamdyǵyn arttyrýǵa jáne júk pen tranzıttik tasymaldardyń ótkizý qabiletin keńeıtýge múmkindik beredi. Bekitilgen kestege sáıkes, temirjol jelisin paıdalanýǵa berý osy jylǵa josparlanǵan,-delingen habarlamada.
Osyǵan deıin «Moıynty – Qyzyljar» temirjol jelisi nesimen tıimdi ekenin jazdyq.
