«Moıynty – Qyzyljar» temirjol jelisi nesimen tıimdi
ASTANA. KAZINFORM - Elimizde Transkaspıı halyqaralyq kólik baǵytyn damytý aıasynda júzege asyrylyp jatqan mańyzdy ınfraqurylymdyq jobalardyń biri — «Moıynty – Qyzyljar» jańa temirjol jelisiniń qurylysy jalǵasyp jatyr.
Uzyndyǵy 300 shaqyrymnan asatyn jańa temirjol jelisi Qaraǵandy jáne Ulytaý oblystary aýmaǵy arqyly ótip, Moıynty men Qyzyljar stantsııalaryn baılanystyrady. Bul ýchaske Transkaspıı halyqaralyq kólik baǵytynyń negizgi bólikteriniń biri sanalady. Jańa jeli iske qosylǵannan keıin júk tasymalynyń qashyqtyǵy 149 shaqyrymǵa qysqarady, Moıynty – Jaryq ýchaskesindegi júkteme azaıady, konteınerlik poıyzdardyń qozǵalys jyldamdyǵy artyp, Qazaqstannyń eksporttyq jáne tranzıttik áleýeti kúsheıedi.
Qazirgi tańda negizgi jer jumystarynyń 90 paıyzdan astamy aıaqtaldy. Rels pen shpal tóseý jumystary 40 paıyzǵa oryndalǵan. Kópirler, qubyrlar, jol ótkelderi jáne mal ótkelderi sekildi nysandardy salý men montajdaý jumystarynyń 65 paıyzdan astamy bitken.
Jobany júzege asyrýǵa onnan astam merdiger uıym tartylǵan. Qurylys jumystary táýlik boıy júrgizilip jatyr. Nysanda 1700-den astam maman men 670-ten asa tehnıka jumys istep jatyr.
Qurylys barysy Qazaqstan Respýblıkasy Úkimetiniń turaqty baqylaýynda.
Josparǵa sáıkes, temirjol jelisin paıdalanýǵa berý bıylǵa jylǵa josparlanǵan.
Osyǵan deıin Dostyq-Moıynty jáne Almaty aınalma temir jolynyń qurylysy bıyl aıaqtalatyny týraly jazdyq.
