Moıynqumda jeńildikpen júrý quqyǵy buzylǵan 1600-den astam turǵyn anyqtaldy
ASTANA. KAZINFORM – Prokýrorlyq qadaǵalaý aktisi boıynsha azamattardyń jeńildetilgen jol júrý quqyǵy qalpyna keltirilip, kináli laýazymdy tulǵalar tártiptik jaýapkershilikke tartyldy.
Jambyl oblysy Moıynqum aýdanynyń prokýratýrasy qoǵamdyq kólikti uıymdastyrý salasyndaǵy jergilikti atqarýshy organnyń qyzmetine taldaý júrgizdi.
Anyqtalǵandaı, 2023 jyldan bastap jolaýshylar tasymalyna arnalǵan sharttar jasasý kezinde zańnamada kózdelgen halyqtyń áleýmettik osal toptary úshin jol júrý aqysyna 50 paıyzdyq jeńildik qarastyrylmaǵan. Bul Qazaqstan Respýblıkasynyń «Avtomobıl kóligi týraly» Zańynyń talaptaryna qaıshy keledi.
Atalǵan zań buzý aýdannyń 1600-den astam turǵynynyń, onyń ishinde múgedektigi bar adamdardyń, kópbalaly analardyń jáne qoǵamdyq kólikti paıdalanatyn 15 pen 18 jas aralyǵyndaǵy kámeletke tolmaǵandardyń quqyqtaryna áser etken.
Prokýrorlyq qadaǵalaý aktisi boıynsha azamattardyń jeńildetilgen jol júrý quqyǵy qalpyna keltirilip, kináli laýazymdy tulǵalar tártiptik jaýapkershilikke tartyldy.
Aıta ketelik Astana prokýratýrasy memleketke 9,8 mlrd teńge óndirý týraly 11 talap qoıǵan edi.
