Moıynqumda alty eldi meken qaıtarylǵan aktıvter esebinen aýyz sýmen qamtylady
ASTANA. KAZINFORM – Jambyl oblysynyń Moıynqum aýdanynda zańsyz ıemdenilgen aktıvterdi qaıtarý esebinen bólingen qarjyǵa alty eldi mekendi táýlik boıy sapaly aýyz sýmen qamtamasyz etý jobasy iske asyrylyp jatyr. Bul týraly oblystyq prokýratýranyń baspasóz qyzmeti habarlady.
Vedomstvonyń málimetinshe, jobaǵa 7 mlrd teńge bólingen. Qazirgi ýaqytta Moıynqum, Qumózek, Birlik, Bınazar, Shyǵanaq aýyldary men Myńaral stantsııasynda qurylys-montaj jumystary qarqyndy júrgizilip jatyr. Jobanyń oryndalýy aýdan prokýratýrasynyń baqylaýynda.
Joba aıasynda aýyz sý nysandary tolyq jańǵyrtylyp, sý jınaý rezervýarlary tazartylýda. Sonymen qatar zamanaýı ári qýatty sorǵy qondyrǵylary ornatylyp, ınjenerlik ınfraqurylym jańartylyp jatyr.
«Bul jumystar aýdannyń 16 myńnan astam turǵynyn úzdiksiz, táýlik boıy sapaly aýyz sýmen qamtamasyz etýge múmkindik beredi», – dep málimdedi prokýratýra.
Buǵan deıin atalǵan aýyldardyń turǵyndary aýyz sýdy belgilengen ýaqytpen ǵana paıdalansa, joba tolyq aıaqtalǵannan keıin taza aýyz sýǵa táýliktiń kez kelgen ýaqytynda qol jetkize alady.
Prokýratýranyń málimetinshe, joba turǵyndardyń turmys sapasyn arttyrýǵa, sanıtarlyq-gıgıenalyq jaǵdaıdy jaqsartýǵa jáne áleýmettik ál-aýqatyn kóterýge baǵyttalǵan.
Aıta keteıik, Shardaranyń 32 myń turǵyny qaıtarylǵan aktıvter esebinen taza aýyz sýǵa qol jetkizdi.
