«Moıdodyr» ertegisindegi qoltyraýynnyń qolynda Quran neǵyp tur?
ASTANA. 28 mamyr. QazAqparat - Oqýshy kezimizde orys ádebıetinen Korneı Chýkovskııdiń «Moıdodyr» degen ertegisin súıip oqýshy edik. Tazalyqqa, uqypty bolýǵa shaqyratyn erteginiń mýltfılmin de súısine kóretinbiz. Jaqynda Reseıdegi Rostov-na-Doný qalasynyń bir baspasynan osy ertegi sýretti kitap bop basylyp shyǵypty. Alaıda, kópshiliktiń kózaıymy bolǵan ertegi musylmandardyń ar-namysyna tıip, ashý-yzasyn týǵyzdy. Sóıtse, ertegi kitapshasyndaǵy tazalyqqa shaqyratyn qoltyraýynnyń qolyna sýretshi Quran Kárimniń bir paraǵyn qystyrtyp qoıypty. Bul týraly muslim.kz saıty jazdy.
Sýretti salǵan E.A.Demıdenko esimdi sýretshi eken. Islam.ru saıty bolǵan jaıdyń mán-jaıyn anyqtamaq bolyp, baspanyń redaktsııasyna habarlasypty. Redaktsııadaǵylar: «Sizder habarlasqanǵa deıin biz qoltyraýyn qolyndaǵy paraqtyń Quran Kárim ekenin bilmedik. Biz bul sýretterdi E.A.Demıdenko esimdi sýretshiden satyp aldyq. Onyń Quran paraǵyn salyp qoıǵanyna mán bermeppiz. Onyń qandaı nıetpen salǵanyn da bilmeımiz. Telefonyna habarlassaq, jaýap bermeıdi», - dep jaýap beripti.
Redaktsııa óz tarapynan keshirim suraǵan, desek te bul sýretke sýretshi jaýap berýi kerek dep esepteıdi.
Jalpy, sýretshi Qurandy qoltyraýynnyń qolyna qandaı nıetpen, ne maqsatpen ustatty? Bul jerde sýretshiniń «bilmeı qalyppyn, baıqamaı qalyppyn» degen syltaýyna endi eshkim de senbeıtin sekildi.
Mundaı qubylysty buǵan deıin tek batystan estýshi edik. Al endi kórshimiz Reseıge de jetýi jaqsylyqtyń nyshany emes. Sondyqtan da, mundaı áreketterge tıisti jazasy berilýi kerek. Reseı Dýmasynda birinshi jáne ekinshi oqylymnan ótken senim ıeleriniń ar-namysyna tıisip, nanymyn kemsitkenderdi jazalaý týraly zań qabyldanatyn bolsa, E.A.Demıdenkoǵa úsh jylǵa deıin bas bostandyǵynan aıyrý jazasy tónip tur.
