Mo ıAn Astanany «Ortalyq Azııanyń merýerti» dep atady
ASTANA. KAZINFORM — Nobel syılyǵynyń laýreaty, qytaı jazýshysy Mo ıAn maýsym aıynda Qazaqstanǵa shyǵarmashylyq saparmen kelip qaıtqan edi. Keshe qytaılyq TideNews platformasy jazýshynyń Astana saparynda túsirgen fotosýretteri men sońǵy kallıgrafııalyq týyndylaryn jarııalady.
Belgili bolǵandaı, Mo ıAnnyń Qazaqstanǵa sapary Qazaqstan Jazýshylar odaǵynyń resmı shaqyrýymen «Qazaqstan-Qytaı mádenıet jyly» bastamasynyń aıasynda uıymdastyrylǵan ádebı-mádenı is-sharalardyń bir bóligi retinde iske asyrylǵan.
Jazýshynyń sapar kezinde túsirgen fotosýretteri, sapardan keıin Astana men qazaq sóz óneriniń qurmetine arnaǵan kallıgrafııalyq týyndylary 4 qyrkúıekte TideNews aqparattyq platformasynda «ıAobıan» aıdarymen jarııalandy. Bul aıdar — jazýshy Mo ıAn men kallıgraf Van Chjen birlesip júrgizetin óner jobasynyń arnaıy paraqshasy. Onda negizinen jeke shyǵarmashylyq saparlar men óner týyndylary týraly jazbalar jarııalanady.
Astanaǵa sapary kezinde Mo ıAn qalanyń birqatar kórikti jerin sýretke túsirgen. Osy rette Báıterek, NURBANK jáne «Nur-Álem» bolashaq mýzeıi qytaılyq jazýshynyń kamerasyna ilingen.
Jazýshy bas shaharǵa arnap qytaı ıeroglıfterimen «Astana — Ortalyq Azııanyń merýerti» dep jazylǵan kallıgrafııalyq týyndy jasaǵan. Qoljazbaǵa «Qyjyl Jylqy jylynyń besinshi aıy, Qazaqstannyń jańa baıtaǵy Astanaǵa sapar» degen túsinikteme jazyp, qolyn qoıǵan.
Belgili bolǵandaı, Mo ıAn osy saparynda qytaılyq jeti býyndy klassıkalyq óleń úlgisimen «Jańa astana — teriskeı aımaq» atty óleń jazǵan.
Óleńde Arqa tósindegi Astananyń elorda retinde qalyptasýy men qalanyń qarqyndy damýy sýretteledi:
Mo ıAnnyń bul óleńi resmı kezdesý oraıynda týǵan jaı arnaý emes, Astananyń sáýleti men Arqanyń kelbetine kózi toıǵan qalamgerdiń júregin jaryp shyqqan shynaıy yqylasynyń kýási.
Astanada ótken kezdesýde, Mo ıAn «Qazaq ádebıetin jetkilikti deńgeıde oqymaǵanym úshin keshirim suraımyn. Oǵan sebepter de bar. Óıtkeni, qytaı tiline aýdarylǵan qazaq ádebıeti úlgileri óte az. Osy sapardan qaıtqannan keıin, qazaq jazýshylarynyń qytaı tiline aýdarylǵan shyǵarmalaryn izdep taýyp, tanysamyn» degen edi.
Nobeldiń ıegeri ýádesinde turǵan sııaqty, osy rette qytaılyq jazýshy Abaı Qunanbaıulynyń «Dúnıe — úlken kól, Zaman — soqqan jel. Aldyńǵy tolqyn — aǵalar, Artqy tolqyn — iniler» jáne «Árkimdi zaman súıremek, Zamandy qaı jan bılemek? Zamandy jaman kúılemek, Zamana ony ılemek» degen óleń joldarynyń qytaısha aýdarmasyn oqyrmandaryna kallıgrafııa retinde usynady.
Sondaı-aq, Mo ıAn qazaqtyń «Erdiń kórki — pyraq, kóldiń kórki — quraq» degen maqalynyń qytaısha nusqasyn da kórkem kallıgrafııaǵa túsirgen. Týyndyǵa «Qyzyl Jylqy jylynyń jetinshi aıynyń jetinshi kúni» dep qol qoıǵan, bul 2026 jylǵy 20 tamyzǵa sáıkes keledi.
Demek, qytaılyq jazýshy Astana saparynan alǵan áserinen kópke deıin aıyǵa almaı júrgen sekildi.
Jazýshynyń Astanaǵa arnalǵan óleńi men husnıhaty jáne Abaı shyǵarmalaryn qolymen kóshirip, kópke usynýy qazaq-qytaı halyqtary arasyndaǵy mádenı jáne ádebı baılanystardy nyǵaıtyp, ózara túsinistikti tereńdete túseri daýsyz.
Sınhýa agenttigine bergen jazbasha suhbatynda Qazaqstan Prezıdenti Qasym-Jomart Toqaev Qazaqstan men Qytaıdyń strategııalyq seriktestigi shyn máninde jan-jaqty sıpat alyp otyrǵanyn aıtqan bolatyn.
