Motsarttyń 1778 jylǵy qoljazbasy álemge alǵash ret tanystyrylady
PAVLODAR. KAZINFORM - Frantsııada buryn belgisiz bolǵan Volfgang Amadeı Motsarttyń qoljazbasy — 1778 jyly Parıjde jumys istegen kezinde jazylǵan 44 bettik notalyq dápteri tabyldy, dep habarlaıdy DW.
Mamandar bul oljany sońǵy onjyldyqtaǵy eń mańyzdy mýzykalyq jańalyqtardyń biri dep baǵalap otyr.
Qoljazba uzaq ýaqyt boıy Frantsııa ulttyq kitaphanasynyń mýzykalyq bóliminde on segizinshi ǵasyrdyń sońyna tıesili avtory belgisiz qujat retinde saqtalǵan. Mýzykalyq qorlardyń kýratory Fransýa-Per Gýa 2026 jyldyń aqpan aıynda jazbalardyń bir bóligi Motsarttyń qoltańbasyna uqsas ekenin baıqaıdy. Keıinnen saraptama onyń boljamyn rastady.
Dápterde kompozıtsııa jazýǵa arnalǵan jattyǵýlar men fleıta jáne arfaǵa arnalǵan jeti shyǵarma qamtylǵan. Zertteýshilerdiń pikirinshe, bul — 22 jastaǵy Motsarttyń 1778 jyldyń mamyr-shilde aılary aralyǵynda óziniń shákirti, gertsog de Gınniń qyzy Marı-Lýıza-Fılıppına de Gınge kún saıyn ótkizgen sabaqtarynyń materıaldary.
Mamandardyń baǵalaýynsha, bul dápter Motsarttyń kompozıtsııany qalaı oqytqanyn kórsetetin búginge deıingi eń erte belgili derek. Motsarttyń sabaqtary barysynda jazylǵan fleıta men arfaǵa arnalǵan alty shyǵarma tolyq saqtalǵan jáne qazirgi kontserttik repertýardy tolyqtyrýy múmkin. Qoljazbadaǵy kóptegen úzindiniń avtorlyǵy ortaq sıpatqa ıe, óıtkeni onda ustaz ben shákirttiń jazbalary qatar órilgen.
Sońǵy jattyǵý aıaqtalmaı qalǵan, al dápterdiń sońǵy alty beti bos. Zertteýshiler sabaqtar Marı-Lýıza de Gınniń 1778 jylǵy 26 shildedegi úılený toıynan keıin toqtaǵan dep esepteıdi.
Tabylǵan shyǵarmalar alǵash ret 21 maýsymda Frantsııa ulttyq kitaphanasynyń Sopaq zalynda kópshilik aldynda oryndalady. Shyǵarmalardy fleıtashy Matılda Kalderını men Frantsııa radıosynyń fılarmonııalyq orkestriniń arfashysy Nıkolıa Tıýle oryndaıdy. Al kelesi kúni bul týyndylardyń álemdik radıopremerasy Frantsııa radıosynyń efırinde ótedi.
Aıta ketelik Ataqty Queen tobynyń «Bogema rapsodııasy» ániniń qoljazbasy 1,4 mln fýnt sterlıngke satylǵan edi.
