Mosýl irgesindegi Shýra qalasy azat etildi
ASTANA. QazAqparat - Irakta Mosýl úshin shaıqas jalǵasyp jatyr, dep jazady «Habar 24».
Áskerıler onyń irgesindegi Shýra qalasyn sodyrlardan azat etti. Sarbazdar eldi mekendi artıllerııalyq qarýmen atqylap, artynsha áýeden soqqy bergen. Endi jaýyngerler qalany Mosýlǵa ońtústik baǵyttan shabýyl jasaý úshin platsdarm retinde paıdalanbaq.
Aıta ketken jón, 17 qazanda Irak áskeri men kúrd jasaǵy AQSh qarýly kúshteriniń qoldaýymen Mosýldy azat etý operatsııasyn bastaǵan. Shahar «Irak pen Levant lańkestik tobynyń» astanasy sanalady.
Áskerı operatsııa bastalǵan eki apta ishinde 16 myńnan astam turǵyn qaladan bosyp ketken. Kóbi ýaqytsha lagerlerdi panalaýǵa májbúr.
