«MOSKVA» saýda úıi basshylyǵy: Myńdaǵan adam jumysynan aıyrylýy múmkin
ALMATY. QazAqparat - Almatyda «MOSKVA metropolitan» saýda úıiniń basshylyǵy baspasóz máslıhatyn ótkizip, sot sheshiminiń saýda úıin jabý týraly úkimine qatysty túsinikteme berdi, dep habarlaıdy QazAqparat tilshisi.
«Keshe qalalyq sot bizdiń saýda úıin jabý týraly sheshim shyǵardy. 2018 jyldyń kókteminde Almatyda barlyq saýda úıleri tekserildi. Tekserý barysynda 22 eskertý jasaldy. Olardyń 21-i sol aıda jóndeldi. Bir sheshim boıynsha biz birjaqty jaǵdaıda ony sheshe almaımyz», - dedi saýda úıiniń dırektory Nurlan Ibraev.
Dırektordyń meńzegen eskertýi saýda úıine jaqyn ornalasqan «Sarıta» kafesiniń qyzmetine baılanysty bolyp otyr.
Órt sóndirý qaýipsizdigine baılanysty ǵımarattar bir-birine qatty jaqyn ornalaspaýy kerek.
Atalǵan dámhana jeke kásipkerge tıesili.
«Eki ǵımarat arasyndaǵy órt qaýipsizdigi saqtalýy úshin qashyqtyq 2 metrden kem bolmaýy kerek. Sonymen qatar japsarlas ornalasqan ǵımarattardyń biriniń qabyrǵasy (dámhananyń) tez tutanǵysh materıaldardan jasalǵan», - dedi Saýda úıiniń quqyqtyq máseleleri boıynsha dırektory Serik Sembaev.
Onyń aıtýynsha, saýda úıiniń ákimshiligi dámhananyń basshylyǵymen máseleni sheshýge tyrysqan.
Jeke kásipker ǵımarattyń qasbetin ózgertý úshin shyǵyndy saýda úıi kóterip alǵanyn qalap otyr.
«Kafe basshysy biz úshin osy máseleniń aýadaı qajettigin bilip otyr. Olar ózderi tekserýge jatpaıtyn sýbekt bolǵan soń bizge dámhanasy men jer ýchaskesin asa qymbat baǵada satýǵa nıetti», - dedi Serik Sembaev.
Al saýda úıiniń basshylyǵy qazir jeke kásipkerdi sotqa berip, ǵımarattyń qasbetin aýystyrýǵa májbúrleýdi qolǵa aldy.
Nurlan Ibraev «MOSKVA metropolitan» saýda úıin ashýǵa 12 mlrd teńge ınvestıtsııa salynǵanyn aıtty.
Ár aı saıyn arendatorlardan 1,5 mlrd teńge kóleminde jalǵa alý aqysy tólenedi. Myńdaǵan adam osy saýda úıinde eńbek etip, jalaqy alyp otyr.
«Endi osy adamdar jumysynan aırylyp qalý qaýpi bar. Aı saıyn biz 240 mln teńge salyq tóleımiz. Al TJD tarapynan ǵımarattyń ishine qatysty eskertý joq. Qazir dámhanamen japsarlas qabyrǵany 2,5 saǵattyq otqa tótep beretin materıalmen qaptap qoıdyq», - dedi N.Ibraev.
Munyń aldynda Almaty qalalyq sotynyń apellıatsııalyq kollegııasy qalalyq TJD «MOSKVA metropolitan» saýda úıiniń jumysyn órt qaýipsizdigi eskertýleri qalpyna keltirilgenshe toqtatý týraly aldyńǵy sot sheshimin ózgerissiz qaldyrǵan bolatyn.
