Mosbırjda krıptovalıýtanyń testilik saýdasy bastalýy múmkin
MÁSKEÝ.KAZINFORM - Máskeý bırjasy (Mosbırja) bıyl jyl sońyna qaraı krıptovalıýtalarmen mámileler jasaýǵa daıyn bolady dep esepteıdi. Bul týraly onyń basshysy Vıktor Jıdkov málimdedi.
Onyń paıymdaýynsha, iske qosý retteýshi organ qajetti jaǵdaılardy jasaǵannan keıin ǵana júzege asady, dep habarlaıdy agenttik tilshisi reseılik BAQ-qa silteme jasap.
Onyń pikirinshe, másele bıyl jyl aıaǵynda sheshiledi. Óıtkeni aldymen zańnamalyq bazany qabyldaý, sondaı-aq barlyq normatıvtik qujattardy ázirleý, egjeı-tegjeıli pysyqtaý jáne taldaý qajet.
Sonymen qatar, Mosbırja krıptovalıýtalarmen saýda jasaý tujyrymdamasyn ázirlep, naryq qatysýshylary úshin testilik stendter daıyndap jatqanyn naqtylady. Alǵashqy synaqtar jazdyń basynda bastalýy múmkin. Saýdaǵa, eń aldymen, eń ótimdi tsıfrlyq valıýtalar jiberiledi.
Ol sondaı-aq krıptovalıýtalardyń táýlik boıy saýda rejımi bastapqyda kózdelmegenin túsindirdi. Birinshi kezeńde Mosbırja standartty jumys ýaqytynda – Máskeý boıynsha 6:50-den 23:50-ge deıin ótkizedi. Bul ınfraqurylym úshin mańyzdy qadam ekeni atap ótiledi, al saýda erejeleri men rejımderin qatysýshylardyń múddelerin eskermeı túzetýge bolmaıdy — naryq daıyn bolýy kerek.
Sáýir aıynda Máskeý bırjasynyń baıqaý keńesiniń tóraǵasy Sergeı Shvetsov alań 2027 jyldan bastap krıptovalıýtalarmen operatsııalardy iske qosýdy josparlap otyrǵanyn habarlady. Al bir aı buryn Reseı úkimeti krıptonaryqty retteýge qatysty zań jobalaryn maquldaǵan bolatyn. Tsıfrlyq valıýtalarmen jumys isteýge lıtsenzııany tsıfrlyq depozıtarııler, bırjalar, brokerler jáne senimgerlik basqarýmen aınalysatyn kompanııalardy basqarýshylar ala alady.
Buǵan deıin QR Prezıdenti Qasym-Jomart Toqaevqa Qazaqstandaǵy CryptoPay arqyly jasalǵan alǵashqy krıptotólem kórsetilgeni týraly jazǵan bolatynbyz.
