«Morıs Sımashkonyń álemderi» fılmi Máskeýde arnaıy júldege ıe boldy
ASTANA. QazAqparat - QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen «Morıs Sımashkonyń álemderi» («Mıry Morısa Sımashko» - túpnusqa, red) derekti fılmi 17-21 sáýir aralyǵynda Máskeýde ótken 19-shy «DetectiveFest» Halyqaralyq shytyrman oqıǵaly fılmder festıvalinde arnaıy júldege ıe boldy, dep habarlaıdy QazAqparat tilshisi kınokompanııa baspasóz qyzmetine silteme jasaı otyryp.
Derekti fılm Qazaqstannyń halyq jazýshysy Morıs Davydovıch Sımashkonyń ómiri men shyǵarmashylyǵyna arnalǵan.
Fılm «Tórtinshi Rım» atty Sımashkonyń avtobıografııalyq essesi jelisi boıynsha túsirilgen. Fılmniń rejısseri QR eńbek sińirgen óner qaıratkeri, «Qurmet» ordeniniń kavaleri Aleksandr Golovınskıı.
Bıylǵy «DetectiveFest» festıvali «Terrorızm jáne qylmyspen kúres álemdik qaýymdastyqtyń mindeti» degen taqyryppen ótip, oǵan álemniń 20 elinen 80 fılm qatysty.
Aıta keteık, «Detectivefest» Halyqaralyq shytyrman oqıǵaly fılmder festıvaliniń eski ataýy «Zań jáne Qoǵam» bolǵan. Ol 1998 jyldan beri ótkizilip keledi. Festıvaldiń basty maqsatynyń biri - terrorızmmen kúresýge jáne zańǵa baǵynýdy ustanýǵa shaqyratyn telebaǵdarlamalar men fılmder túsiretinderge qoldaý bildirý.
Morıs Sımashko Qazaqstan Prezıdenti beıbitshilik pen rýhanı tatýlyq syılyǵynyń laýreaty, 1986 jyly І.Esenberlınniń «Kóshpendiler» trılogııasyn orys tiline aýdarǵany úshin Abaı atyndaǵy Memlekettik syılyqtyń ıegeri atanǵan. Sondaı-aq, Nobel syılyǵyna ádebıet boıynsha Halyqaralyq PEN klýbynyń úmitkeri.
Sımashko 20 kitaptyń avtory, onyń týyndylary álemniń 40 túrli tiline rekordtyq taralymmen taraǵan, ol jazǵan stsenarııler boıynsha on shaqty fılm túsirilgen. Ortalyq Azııadaǵy jańa tarıhı roman mektebiniń negizin salýshylardyń biri.
Osyǵan deıin atalǵan fılm Máskeýde ótken «Vmeste» XVII Halyqaralyq telekınoforýmda Sh.Aımanov atyndaǵy «Qazaqfılm» AQ túsirgen «Mıry Morısa Sımashko» (rejısseri A.Golovınskıı) atty tolyqmetrajdy derekti fılmi «Lıteratýrnaıa gazeta» basylymynyń atynan «Ortalyq Azııadaǵy jańa tarıhı roman mektebiniń negizin salýshylardyń biri jáne maıdanger ómiriniń beımálim paraqtaryn ashqany jáne sheberligi úshin» arnaıy júldemen marapattalǵan.
