Morenalyq kólderden Almatyǵa keler qaýip joq
ALMATY. QazAqparat – Almaty taýlaryndaǵy muzdyq kólderge áýeden sholý jasaldy, dep habarlaıdy QazAqparat tilshisi.
Tótenshe jaǵdaı departamentiniń málimetinshe, Almaty taýlaryndaǵy morenaldyq kólderdiń jaǵdaıyn jan-jaqty baǵalaý maqsatynda «Qazseldenqorǵaý» memlekettik mekemesi men Almaty qalalyq Tótenshe jaǵdaılar departamentiniń basshylyǵy aerovızýaldyq tekserý júrgizdi.
Jalpy Almaty qalasynyń aýmaǵynda barlyǵy 45 morena kóli bar, onyń ishinde 15 kól qaýipti bolyp sanalady
Tekserý nátıjeleri boıynsha, muzdyq morenaldyq kólder qysqy rejımnen shyǵyp jatyr. Kólderge az kólemde sý tolýda, sý deńgeıi eń tómengi mólsherde.
«Úlken Almaty ózeni basseınindegi №13 kólde sıfon qubyrlary arqyly sý bosatylady. Olar sý deńgeıi kóterilgen kezde avtomatty túrde iske qosylady. Aǵymdaǵy jyly morenalyq kólderdi bosatýdyń aldyn alý jumystary Qarǵaly, Aqsaı, Kishi jáne Úlken Almaty ózenderiniń basseınderinde ornalasqan jarylýǵa qaýipti 7 morena kóline josparlanǵan. Oǵan respýblıkalyq bıýjetten 39 mıllıon teńge bólindi. Jarylýǵa qaýipti bolyp sanalatyn morenalyq kólderge aldyn alý jumystary 15 maýsymnan bastalady. Olardy iske asyrý úshin joǵary qýattylyqtaǵy 9 sorǵy, 10 turǵyn úı modýli, sıfon qubyrlary jáne basqa da qajetti tehnıkalyq resýrstar ázirlendi»,– dep habarlaıdy qalalyq TJD baspasóz qyzmetinen.
Departamentiń málimetinshe, ótken jyly sel paıda bolǵan Qarǵaly ózeni basseınindegi №1 kólde sý mólsheri tómengi deńgeıde bolǵandyqtan, qaýip týdyrmaıdy. Bıyl atalǵan basseınge sý aǵatyn arna salynady, oǵan 14 mıllıon teńge qarastyrylǵan.
«Sonymen qatar, aǵymdaǵy jyly Kishi jáne Úlken Almaty, Qarǵaly jáne Aqsaı ózenderi basseınderinde sel qaýiptiligin baqylaıtyn avtomattandyrylǵan júıe qurylysynyń 2-shi kezeńi bastaldy. Byltyr birinshi kezeńde 10 stansa salyndy. Al bıyl taǵy 21 stansany iske qosý josparda»,– delingen vedomstvo aqparatynda.
Qazirgi ýaqytta jaǵdaı turaqty, «Qazseldenqorǵaý» memlekettik mekemesi jáne Almaty qalasynyń Tótenshe jaǵdaılar departamentiniń mamandarymen sel jaǵdaıy men morena-muzdyq keshenderi turaqty qadaǵalanyp otyrady.
