Moratorıı bızneske jańa Salyq kodeksine beıimdelýge múmkindik beredi — sarapshy
ASTANA. KAZINFORM — Prezıdent Qasym-Jomart Toqaev Qazaqstan halqyna Joldaýynda shaǵyn jáne orta bıznesti tekserýge úsh jylǵa moratorıı engizý máselesin talqylaýdy usyndy. Qarjy sarapshysy Aıbar Oljaevtyń pikirinshe, mundaı shara kásipkerlerge jańa Salyq kodeksine beıimdelip, bıznesti turaqty júrgizýge múmkindik beredi.
— Pandemııa kezinde moratorıı kóptegen shaǵyn jáne orta bıznes sýbektisin saqtap qalýǵa kómektesti. Qazir de kásipkerler salyq júıesindegi ózgeristerge beıimdelip, jańa talaptardy meńgerip jatyr. Sondyqtan osy ótpeli kezeńde, ásirese shaǵyn bızneske, memleket tarapynan qoldaý kórsetý mańyzdy, — dedi sarapshy.
Onyń aıtýynsha, bıznesti qoldaýdyń negizgi joldarynyń biri — kásipkerlerge túsetin ákimshilik júktemeni azaıtý. Tekserister men talaptardyń shamadan tys kóbeıýi kásipkerlerge qosymsha qıyndyq týǵyzýy múmkin. Al turaqty jumys isteýge jaǵdaı jasalsa, olardyń qyzmetin zańdastyryp, tabysyn ashyq kórsetýge yntasy artady. Bul bıznestiń damýyna da, salyq túsimderiniń turaqtylyǵyna da oń áser etedi.
Sarapshy shaǵyn bıznesti qoldaýmen qatar, azamattardyń qosymsha tabys tabýyna múmkindik beretin tsıfrlyq platformalardyń áleýetin de atap ótti. Máselen, aýyl turǵyndary ózderi óndirgen qurt, maı jáne basqa da otandyq ónimderdi marketpleıster arqyly sata alady. Mundaı platformalar ónimdi ótkizýge, tólem qabyldaýǵa jáne jetkizýdi uıymdastyrýǵa kómektesse, aýyldaǵy shaǵyn kásiptiń shyraıy kirmek.
— Bul óz ónimin úı jaǵdaıynda óndiretin jáne aýyl sharýashylyǵymen aınalysatyn adamdarǵa tutynýshylardy keńirek qamtyp, tabysyn arttyrýǵa múmkindik beredi, — dedi sarapshy.
Eske salaıyq, Úkimet jyl sońyna deıin tsıfrlyq jumyspen qamtýdy retteıtin jeńildetilgen quqyqtyq rejım ázirleıdi. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.
