«MoRandi» toby Astananyń týǵan kúnine oraı óziniń «Rock the world» degen jańa ánin usynady
ASTANA. Shildeniń 6-sy. QazAqparat - Búgin saǵat 20.00-de «Astana-Arena» alańynda qazaqstandyq, reseılik jáne shet el estrada juldyzdarynyń qatysýymen «Asqaqtaı ber, Astana!» kontserti ótkiziledi.
Qazaqstan, Reseı, shet eldiń tanymal juldyzdary óner kórsetetin ǵajaıyp Gala-kontsert Qala kúnine oraı alǵash ret uıymdastyrylyp otyrǵan joq. Alaıda atalmysh kontsert astanalyq jastar men mereke qonaqtarynyń kópke deıin esinde qalady dep josparlanýda, dep habarlaıdy qala ákiminiń baspasóz qyzmeti.
Merekelik kontsertke asyǵa kelgen qala turǵyndary men qonaqtary tórt saǵat boıy tanymal oryndaýshylardyń áıgili ánderin tamashalaıtyn bolady. Kontsert qonaqtary - otandyq estradanyń tanymal ártisteri men álemdik hıt-paradtardyń aldyńǵy shebin ıemdengen shet el juldyzdary. Bıylǵy jyly Astananyń týǵan kúni merekesiniń qonaqtary esebinde Sergeı Lazarev, «Gorod 312» toby men «In-ıAn», «A'Stýdıo» shaqyryldy. Qazaqstandyq tyńdarmandar tanymal oryndaýshy r&b Ne-Yo men Morandi syndy áıgili toptyń ónerine Astana tórinde kýá bolady. Búgin «Han-Shatyr» ortalyǵynda ótkizilgen baspasóz máslıhatynda rýmyndyq joba Marıýs Moga ı Andreı Ropchea-Randı bastaǵan «MoRandi» toby Astananyń týǵan kúnine oraı «Rock the world» jańa shyǵarmasyn usynatyny týraly habarlady. Álemge áıgili ánshilerdiń merekelik shashýy esten ketpes naǵyz juldyzdy sátke aınalady dep kútilýde.
