Mopedter endi kólik quraldaryna teńestiriledi: olardy tirkeý tártibi qandaı
ASTANA. KAZINFORM – Qazaqstan Respýblıkasynyń «Jol qozǵalysy týraly» zańyna engizilgen ózgeristerge sáıkes, mopedter mehanıkalyq kólik quraldaryna teńestirildi. Bul týraly Astana qalasy Polıtsııa departamenti habarlady. Endi moped ıeleri kólikterin ishki ister organdarynda mindetti túrde memlekettik tirkeýden ótkizýi kerek.

Jańa erejeler 2025 jyldyń 5 sáýirinen bastap kúshine enedi. Osy kúnnen keıin tirkeýsiz, júrgizýshi kýáliginsiz jáne saqtandyrý polısinsiz mopedterdi basqarýǵa tyıym salynady.
– Zańnamaǵa sáıkes, mopedterge qozǵaltqysh kólemi 50 tekshe santımetrden aspaıtyn nemese elektr qozǵaltqyshy bar, jyldamdyǵy 50 km/saǵ-tan joǵary emes eki nemese úsh dońǵalaqty mehanıkalyq kólik quraldary jatady. Olarǵa mopedter, skýterler jáne basqa da osyǵan uqsas qozǵalys quraldary kiredi, – dedi Astana qalasy PD Ákimshilik polıtsııa basqarmasynyń bastyǵy Nurlan Ývaev.
Mopedterdi qalaı tirkeýge bolady?
Mopedterdi tirkeýden ótkizý úshin menshik ıesi turǵylyqty jeri boıynsha Arnaıy Halyqqa qyzmet kórsetý ortalyqtarynda rásimdeý kerek.
Ol úshin kelesi qujattar qajet:
• Jeke kýálik (elektrondy formatta usynýǵa bolady);
• Tirkeý týraly ótinishti toltyrý;
• Mopedtiń tehnıkalyq qujattary nemese onyń tehnıkalyq sıpattamalary týraly málimetter;
• Mopedti tehnıkalyq tekserýden ótkizý;
• Memlekettik alymdardy tóleý:
* Tirkeý úshin – 983 teńge (0,25 AEK);* Tirkeý kýáligin berý úshin – 4 915 teńge (1,25 AEK);* Memlekettik nómirdi berý úshin – 5 505 teńge (1,4 AEK).
Mopedti basqarý úshin qandaı júrgizýshi kýáligi qajet?
Mopedti basqarý úshin kelesi sanattaǵy júrgizýshi kýáliginiń biri qajet: A1 – 16 jastan bastap, A jáne B – 18 jastan bastap. Sondaı-aq, júrgizýshiler kólik quralyn tehnıkalyq tekserýden ótkizip, azamattyq-quqyqtyq jaýapkershilikti saqtandyrý polısin rásimdeýge mindetti.
- 2025 jyldyń 5 sáýirinen bastap tirkelmegen mopedterdi basqarǵan nemese júrgizýshi kýáligi joq tulǵalar ákimshilik jaýapkershilikke tartylady. Polıtsııa departamenti moped ıelerine tirkeýdi keıinge qaldyrmaı, júrgizýshi kýáligin aldyn ala alyp qoıýdy usynady, – dep atap ótti Astana qalasy PD Ákimshilik polıtsııa basqarmasynyń bólim basshysy Baýyrjan Toqjumanov.
Aıta ketelik 5 sáýirden keıin mopedterin tirkemegenderge qandaı jaýapkershilik kózdelgeni týraly jáne moped ıeleri endi A1 sanatyndaǵy júrgizýshi kýáligin alýǵa mindettelgeni týraly jazǵan edik.