Mopedısterdiń kinásinen eki kúnde 3 adam qaza tapty – ІІM
Elimizde elektrli samokattar men moped júrgizýshileri kóbeıe bastady. Bul týraly Іshki ister birinshi vıtse-mınıstr Marat Qojaev málim etti, dep habarlaıdy QazAqparat tilshisi.
«Sońǵy jyldary elektr samokattar men mopedter kóbeıdi. Olardyń sany endi artpasa, tómendemeıdi. Tek sońǵy eki kúnde mopedısterdiń kinásinen 3 adam qaza tapty. Bıyl 30 tamyzda Májilis depýtattarymen birlesip ázirlengen zań jobasy qabyldandy. Onda elektr samokat uǵymy, júrip-turý erejeleri, sondaı-aq olardyń júrgizýshileriniń quqyqtary men mindetteri bekitilgen. Bul sharalar olardyń júrisin retteýge múmkindik berdi, al polıtsııada yqpal etýdiń naqty tetikteri paıda boldy», - dedi Marat Qojaev Úkimet otyrysynda baıandama jasaı otyryp.
Birinshi vıtse-mınıstrdiń málimdeýinshe, qyrkúıek aıynda ǵana samokat júrgizýshileri tarapynan 1,7 myńnan astam buzýshylyq anyqtaldy.
«Onyń ishinde 562 fakti boıynsha kámeletke tolmaǵandar bolyp shyqty. Bul máseleni polıtsııa arqyly sheshý múmkin emes. Ákimdikter tarapynan ınfraqurylymdy damytý boıynsha sharalar qajet, bólingen jolaqtardy jaılastyrý, jeke velojoldar salý, elektr samokattardyń qozǵalysyna tyıym salynǵan aımaqtarǵa bólý kerek», - deıdi ol.
