Moped sanatyna jatady: Almatyda elektrovelosıped ıelerine eskertý jasaldy

ALMATY. KAZINFORM – Almatyda elektrovelosıpedterdiń sany kúrt ósip, olardy tirkeý máselesi ózekti bolyp otyr. Polıtsııa qýaty joǵary kólikterdiń zań boıynsha moped sanatyna kiretinin eske salyp, tirkeý tek talap emes, ıesiniń quqyǵyn qorǵaý kepili ekenin aıtty.

Keıingi jyldary Almatyda elektrovelosıpedter erekshe tanymal bola bastady. Arzan bolýy, ekologııaǵa zııan keltirmeýi jáne qalada júrýge yńǵaıly bolǵandyqtan, elektrovelosıpedterge suranys kóbeıdi. Alaıda polıtsııanyń habarlaýynsha, keıbir turǵyndar olardy mopedtiń balamasy retinde qoldanyp, zańda belgilengen tirkeý talaptaryn oryndamaı júr.

Almaty Polıtsııa departamentiniń málimetinshe, qazirgi zamanǵy elektrovelosıpedterdiń kóbi saǵatyna 40-45 shaqyrym jyldamdyqpen júrip, 400 vatttan joǵary qýatqa ıe. Bul kórsetkish zańda belgilengen normadan asyp túsetindikten, olar moped sanatyna jatady. Mundaı kólikterdi tirkeý mindetti: tehnıkalyq pasport, memlekettik nómir jáne saqtandyrý qujaty bolýy kerek.

– Azamattardyń elektrovelosıpedke degen qyzyǵýshylyǵyn túsinemiz, biraq zań boıynsha qýaty 250 vatttan joǵary jáne jyldamdyǵy 25 km/saǵ asatyn kólikter moped sanatyna kiredi. Sondyqtan olardy tirkeýsiz qoǵamdyq joldarda júrgizýge bolmaıdy. Bul talaptar qaýipsizdikti qamtamasyz etýge jáne ıeleriniń quqyǵyn qorǵaýǵa baǵyttalǵan, - dedi Almaty Polıtsııa departamenti Ákimshilik polıtsııa basqarmasynyń bastyǵy Ashat Qulbaev.

Sondaı-aq polıtsııa tirkeý kóliktiń urlanǵan nemese joǵalǵan jaǵdaıda ıesine qaıtarýdy jeńildetetinin atap ótti. Al tirkeýsiz paıdalaný jol-kólik oqıǵalarynyń artýyna jáne jol qozǵalysy ınfraqurylymyna salmaq túsýine sebep bolýy múmkin.

Eske salaıyq, bıyl el aýmaǵynda 5 sáýirge deıin mopedterdi resmı tirkeý mindeti qoıyldy. 5 sáýirden bastap jol erejesin buzǵan moped júrgizýshilerine jaza qatańdatyldy.

Sondaı-aq buǵan deıin Qazaqstanda 50 myńǵa jýyq moped tirkelgenin habarlaǵan edik.