Moped pen elektrli samokattyń kesirinen 1,7 myń adam japa shekken
ASTANA. KAZINFORM – 2024 jyldyń qańtarynan 2025 jyldyń naýryzyna deıin moped, elektrli samokat jáne shaǵyn elektrli kólik quraly júrgizýshileriniń kinásinen 1 597 jol-kólik oqıǵasy boldy. Bul týraly Kazinform agenttiginiń saýalyna Bas prokýratýranyń Quqyqtyq statıstıka jáne arnaıy esepke alý komıteti joldaǵan resmı jaýapta aıtylǵan.
Komıtet usynǵan málimetterge sáıkes, 2024 jyly moped júrgizýshileriniń (aspaly qozǵaltqyshy bar velosıpedter, mokıkter jáne skýterler) kinásinen - 1 260, elektrli samokat júrgizýshileriniń kinásinen – 90, al shaǵyn elektr kólikteri júrgizýshileriniń kinásinen – 144 jol-kólik oqıǵasy tirkelgen.
Bul kólik oqıǵalarynyń kesirinen 1 748 adam zardap shekti, onyń ishinde 654-i kámeletke tolmaǵan. Jalpy 1 636 adam jaraqat aldy (onyń ishinde 631-i — bala), al 112 adam, onyń ishinde 23 bala qaza boldy.
Jyl basynan beri moped júrgizýshileri men shaǵyn elektr kólikterin júrgizýshilerdiń kinásinen 103 kólik oqıǵasy tirkelip, sonyń saldarynan 3 adam qaıtys boldy, onyń ishinde 1-eýi — bala. 118 adam jaraqat aldy, onyń 37-si – balalar.
2025 jyly elektrli samokat júrgizýshileriniń qatysy bar JKO tirkelmegen.
Aıta keterligi, atalǵan kólik quraldarynyń arasynda ásirese moped júrgizýshileriniń kinásinen bolǵan jol apattarynda adam kóp zardap shekken: ótken jyly 1 461 adam jaraqat alǵan, onyń ishinde 502-si — kámeletke tolmaǵandar. Osy oqıǵalardyń saldarynan 76 eresek adam men 18 bala mert bolǵan.
Komıtetten atap ótkendeı, kólik júrgizýshileriniń kinási boıynsha aqparattar jol-kólik oqıǵalary týraly esepte tek 2024 jyldan bastap kórsetile bastady, aldyńǵy jyldary mundaı málimet jeke jınalmaǵan. Osy sebepti aldyńǵy jyldarmen salystyryp, bul kórsetkishtiń ósip ne tómendep kele jatqany jaıly sóz qozǵaı almaımyz.
Endigi jerde barlyq statıstıkalyq esepterdi qamqor.gov.kz aqparattyq portalynan kórýge bolady.
Bir atap óterligi, 5 sáýirden bastap zańnamalyq ózgerister kúshine enip, mopedter mehanıkalyq kólik quraldaryna teńestirildi. Budan bylaı moped júrgizýshisi mehanıkalyq kólik quraldarynyń júrgizýshilerine júktelgen jaýapkershiliktiń barlyq spektrin moınyna alady.
QR ІІM resmı aqparatyna sáıkes, búginde elimizde 30 253 moped tirkelgen.
— Moped, velosıped jáne elektrsamokat júrgizýshileri - jol qozǵalysynyń qatysýshylary. «Jol júrisi týraly» Zańnyń 57-babyna sáıkes, velosıped júrgizýshileri trotýarmen qozǵalady. Elektrosamokat júrgizýshileri atalǵan bapqa sáıkes, velosıped jolymen nemese velosıped jolaǵymen júredi. Velosıped joly nemese jolaǵy bolmaǵan jaǵdaıda, elektrosamokat júrgizýshileri jaıaý júrginshiler jolymen nemese trotýarmen 6 km/saǵ jyldamdyqtan aspaıtyn jyldamdyqpen, jaıaý júrginshilerge qaýip tóndirmeı qozǵalýy tıis, — dep habarlady ІІM baspasóz qyzmeti Kazinform saýalyna jaýap bere otyryp.
Sondaı-aq, vedomstvo ótken jyly keıbir kólik túrleriniń qozǵalysyn uıymdastyrý jáne jol qaýipsizdigin tsıfrlandyrý máseleleri boıynsha zańnamaǵa túzetýler engizilgenin eske saldy. Oǵan sáıkes qozǵaltqyshy bar velosıpedterge trotýarmen nemese jaıaý júrginshiler jolymen júrýge tyıym salyndy.
— Jol qozǵalysy qaýipsizdigin qamtamasyz etý jáne qoǵamdyq tártipti saqtaý maqsatynda ishki ister organdary profılaktıkalyq is-sharalar júrgizedi. Buqaralyq aqparat quraldarynda, bilim berý uıymdarynda jáne basqa da alańdarda moped pen samokat júrgizýshileriniń jol qozǵalysy erejelerin saqtaý máseleleri boıynsha ashyq túsindirý jumystary júrgizilýde, — dep atap ótti mınıstrlikten.
Atqarylyp jatqan túsindirý jumystaryna qaramastan, QR ІІM derekterine sáıkes, 2025 jyldyń alǵashqy úsh aıynda 7 034 moped júrgizýshisi jáne 1 386 samokat júrgizýshisi ákimshilik jaýapkershilikke tartyldy.
Elimizde osy jyldyń 5 sáýirine deıin mopedterdi tirkeý júrgizildi. 5 sáýirden keıin tirkelmegen mopedterdiń qozǵalysyna tyıym salyndy. Quqyq buzýshylyq anyqtalǵan jaǵdaıda Ákimshilik quqyq buzýshylyq týraly kodekstiń 590-baby 2-tarmaǵymen ákimshilik jaýapkershilik kózdelgen - 10 AEK aıyppul (1 AEK mólsheri - 3 932 teńge).
Sońǵy derek boıynsha, Astanada resmı 1 341 moped tirkelip, kýálik berildi.