Moped ıeleri endi A1 sanatyndaǵy júrgizýshi kýáligin alýǵa mindetti
ASTANA. KAZINFORM – Bul týraly brıfıng barysynda QR Іshki ister mınıstrliginiń resmı ókili Shyńǵys Álekeshev málim etti.
Onyń sózinshe, 3 qazan kúni elimizde Ákimshilik quqyq buzýshylyqtar týraly kodeks pen jol qozǵalysyn retteýge baǵyttalǵan zańnamaǵa aýqymdy ózgerister engizetin zańdarǵa qol qoıyldy. Olardyń baasty bólikteri bıylǵy jyldyń 4-shi jeltoqsanynda kúshine enedi. Al 2025 jyldyń 4-shi sáýirinen bastap, moped júrgizýshilerine qatysty ózgerister iske qosylady.
«Taǵy biz mańyzdy ózgeris mopedterdiń mindetti memlekettik tirkeýi bolyp tabylady. Moped júrgizýshileri endi kólik quralyn tirkeýge jáne A1 sanatyndaǵy júrgizýshi kýáligin alýǵa mindetti. Eger júrgizýshiniń A jáne V sanatyndaǵy júrgizýshi kýáligi bar bolsa, ol moped júrgize alady»,-dedi Shyńǵys Álekeshev.
Onyń sózinshe, 2025 jyldyń 4-shi sáýiri kúni moped júrgizýshilerine jol qozǵalysyna baılanysty barlyq talaptar qoıyla bastaıdy. Onyń ishinde mopedti ishimdik iship alyp júrgizýge tyıym salý talaby da bar.
«Ózgeristerge saı, júrgizýshi kýáligi joq adam mas kúıinde kólik basqaryp ustalsa, ol júrgizýshi kýáligine 7 jylǵa deıin emtıhan tapsyra almaıdy. Osyndaı talaptar medıtsınalyq kýálandyrýdan ótpegenderge qatysty da qoıylady»,- dep eskertti QR Іshki ister mınıstrliginiń resmı ókili.
Ol sonymen qatar jańa talaptardyń birinshi kezekte júrgizýshilerdiń jaýapkershiligin arttyryp, alkogoldi ishimdik iship, esirtki qabyldap, kólik basqarý áreketteriniń aldyn alýmen baılanysty ekenin jetkizdi.
