Moonshot AI JI-diń álemdegi eń iri erekshe modelin tanystyrdy
ASTANA. KAZINFORM – Qytaıdyń Moonshot AI startapy óziniń Kimi K3 flagmandyq jasandy ıntellekt modelin tanystyrdy. 2,8 trıllıon parametri bar bul júıe álemdegi eń iri ashyq bastapqy kodty neırojelige aınaldy, dep habarlaıdy Xinhua agenttigi.
Kimi K3 mýltımodaldi múmkindikterdi, ıaǵnı sýret pen beıneni tanýdy qoldaıdy jáne kólemi 1 mıllıon tokenge deıingi konteksti óńdeı alady. Ázirleýshiler modeldi baǵdarlamalaý, úlken derekterdi tereń taldaý, ǵylymı zertteýler júrgizý jáne kúrdeli vızýaldy suranystardy oryndaý sııaqty mindetterge beıimdegen.
– Parametrler sany neǵurlym kóp bolsa, modeldiń múmkindigi de soǵurlym joǵary bolady ári ol ıntellektýaldy nátıjelerdi usyna alady, – dep málimdedi Moonshot AI kompanııasy.
Kompanııanyń ishki synaqtarynyń nátıjesine sáıkes, ashyq bastapqy kodty Kimi K3 jalpy múmkindikteri jaǵynan jabyq kodty kommertsııalyq kóshbasshy modelderdiń deńgeıine jaqyndaǵan.
Sarapshylardyń pikirinshe, Qytaıdyń ashyq bastapqy kodty iri tildik modelderi jekelegen jetistikterden birlesken damýǵa kóship, jasandy ıntellekttiń jahandyq damýyna jańa tásilder usynyp otyr.
Aıta keteıik, buǵan deıin Qazaqstanda qandaı jasandy ıntellekt servısteri kóp qoldanylatynyn jazdyq.
Sondaı-aq Alakólde joǵalǵan balalardy izdeýge jasandy ıntellekt kómektesetin boldy.
