Moody’s Ratings: Tájikstannyń kredıttik reıtıngi «B2» deńgeıine deıin kóterildi

ASTANA. KAZINFORM — Halyqaralyq «Moody’s Ratings» reıtıngtik agenttigi Tájikstan Respýblıkasynyń uzaq merzimdi sýverendik kredıttik reıtıngin «B2» deńgeıine deıin kóterip, onyń boljamyn «turaqty» dep baǵalady. Bul týraly Tájikstannyń ulttyq «Hovar» agenttigi habarlady.

Tájikstan Ulttyq bankiniń resmı habarlamasyna súıensek, el 2014 jyldan beri «Moody’s Ratings» halyqaralyq reıtıngtik agenttigimen yntymaqtastyq ornatyp keledi. Eldiń sýverendik reıtıngi alǵash ret «B2» deńgeıine deıin kóterilip otyr. Bul jetistik elde teńgerimdi makroekonomıkalyq saıasatty dáıekti túrde júzege asyrýdyń jáne qurylymdyq reformalardy júrgizýdiń nátıjesi retinde qarastyrylady.

Reıtıngtik agenttiktiń baǵalaýynsha, reıtıngtiń «B3» deńgeıinen «B2» deńgeıine deıin kóterilýi sońǵy jyldardaǵy el ekonomıkasynyń turaqty ósimimen, qarjy-bıýdjet salasynyń nyǵaıýymen jáne oń makroekonomıkalyq kórsetkishterdiń saqtalýymen baılanysty.

– Turaqty» boljam reıtıngtik agenttiktiń orta merzimdi perspektıvada qarjy-bıýdjet saıasatynyń teńgerimdi júrgizilýi jalǵasady jáne makroekonomıkalyq turaqtylyq saqtalady degen oń boljamyn bildiredi. Sonymen qatar ekonomıkalyq jáne qurylymdyq reformalardy jalǵastyrý, memlekettik boryshtyń turaqtylyǵyna baılanysty táýekelderdi azaıtý, sondaı-aq memlekettik qarjyny basqarýdy kúsheıtý eldiń reıtıngtik baǵasynyń ósýine yqpal etken negizgi faktorlardyń biri bolyp otyr, – delingen Tájikstan Ulttyq bankiniń aqparatynda.

Eldiń sýverendik kredıttik reıtınginiń joǵarylaýy halyqaralyq seriktester men qarjy naryqtarynyń Tájikstan Respýblıkasynyń makroekonomıkalyq saıasaty men qarjylyq turaqtylyǵyna degen seniminiń artqanyn kórsetedi. Sondaı-aq bul ınvestıtsııa tartý múmkindikterin keńeıtýge, qaryz alý qunyn tómendetýge jáne eldiń halyqaralyq qarjy arenasyndaǵy pozıtsııasyn nyǵaıtýǵa qolaıly jaǵdaı jasaıdy.

Aıta keteıik, buǵan deıin Azııa damý banki Tájikstan jobalaryna 1,1 mıllıard dollar bóletinin jazdyq.