Moody’s Ratings Qazaqstannyń jalpy saqtandyrý sektoryna pozıtıvti boljam jarııalady

ASTANA. KAZINFORM — Moody’s Ratings Qazaqstannyń jalpy saqtandyrý sektoryna pozıtıvti boljam berdi. Agenttik 2026-2027 jyldary eldegi turaqty ekonomıkalyq ósim aıasynda korporatıvtik jáne bólshek saqtandyrýǵa suranys artyp, sektor tabystylyǵy joǵary deńgeıde saqtalady dep kútedi. 

Bul týraly Qazaqstan qarjygerler qaýymdastyǵy taldaý materıalynda aıtylǵan. Taldaý ortalyǵynyń málimetinshe, 2026 jyly menshikti kapıtaldyń ortasha ólshengen tabystylyǵy 20 paıyzdan asady. Bul joǵary paıyzdyq mólsherlemeler aıasyndaǵy jalpy saqtandyrý kompanııalarynyń jaqsy ınvestıtsııalyq kirisin, sondaı-aq táýekelderdi baǵalaý jáne tarıftik saıasatty jetildirý kórsetkishteriniń jaqsarýyn kórsetedi. Qosymsha qoldaý faktory retinde qolaıly retteýshi orta atalady.

Qazaqstannyń jalpy saqtandyrý sektorynyń negizgi draıverlerine sholý:

— Makroekonomıkalyq orta jaqsaryp keledi. Moody’s agenttigi 2026-2027 jyldary Qazaqstanda turaqty ekonomıkalyq ósim jalǵasady dep kútedi. Bul korporatıvtik jáne bólshek saqtandyrýǵa suranystyń artýyna yqpal etedi.

— Saqtandyrý salasynyń tabysy joǵary deńgeıde qala beredi. Óıtkeni kompanııalar táýekelderdi burynǵydan dálirek baǵalaı bastady. 2026–2027 jyldary ınflıatsııa tómendep, shyǵyndar turaqtalady dep kútiledi. Sonymen qatar paıyzdyq mólsherlemeler joǵary bolǵandyqtan, kompanııalardyń ınvestıtsııadan túsetin tabysy da artady.

— Aktıvter táýekeli turaqty deńgeıde saqtalady. Aktıvterdiń 70 paıyzdan astamy tirkelgen kirisi bar ınvestıtsııalyq sanattaǵy baǵaly qaǵazdarǵa, negizinen memlekettik jáne kvazımemlekettik baǵaly qaǵazdarǵa ornalastyrylǵan.

— Kapıtal jetkiliktiligi turaqty. Kapıtaldyń ishki generatsııasynyń joǵary bolýy jáne tólem qabilettiliginiń retteýshilik kórsetkishteriniń joǵary deńgeıi saqtandyrýshylardyń qarjylyq turaqtylyǵyn qoldaıdy.

— Retteýshilik jáne ESG táýekelderi jaqsaryp keledi. Retteýshi organdar men Úkimettiń bastamalary saqtanýshylardyń quqyqtaryn qorǵaýdy kúsheıtip, saqtandyrý naryǵynyń uzaq merzimdi ósýine qolaıly jaǵdaı qalyptastyrýǵa yqpal etedi.

Sonymen qatar, Moody’s Ratings Qazaqstandaǵy jalpy saqtandyrý sektoryn damytatyn negizgi faktorlardy da atap ótken. Tolyq aqparatty silteme arqyly oqı alasyz. 

Aıta keteıik, Qazaqstanda saqtandyrý jáne qor naryǵyn damytýdyń 2030 jylǵa deıingi baǵdarlamasy ázirlenedi.