Moody’s Qytaıǵa qatysty teris boljamdy ózgerissiz qaldyrdy

ASTANA. KAZINFORM — Moody’s halyqaralyq reıtıng agenttigi Qytaıǵa qatysty «teris» boljamdy ózgerissiz qaldyrdy, degenmen, táýelsiz nesıe reıtıngin «A1» deńgeıinde rastady.

Lianhe Zaobao basylymynyń habarlaýynsha, Moody’s dúısenbi kúni Qytaıdyń «A1» táýelsiz nesıe reıtıngin rastady. Agenttiktiń aıtýynsha, 2023 jyly jeltoqsan aıynda Qytaıdyń reıtıng boljamy «turaqtydan» «teriske» tómendetilgennen beri, boljamǵa negiz bolǵan faktorlar aıtarlyqtaı ózgergen; jergilikti memlekettik qaryz ben memlekettik kásiporyndardyń qarjylyq jaǵdaıy endigári negizgi táýekelder sanalmaıdy. 

Moody’s Qytaı úkimetiniń maqsatty saıasatynyń arqasynda aıtylǵan táýekelderdiń edáýir azaıǵanyn, endigári «A1» reıtıngine naqty qysym túsirmeıtinin atap kórsetti.
Alaıda, mamyr aıynda Qytaı men AQSh arasynda tarıftik kelisimge qol qoıylǵanyna qaramastan, Moody’s bolashaq saýda shekteýleri men jahandyq saýda aǵynyndaǵy belgisizdik táýekelderi áli saqtalyp otyrǵanyn atap ótti.

Qytaıdyń Qarjy mınıstrligi dúısenbi kúni Moody’s-tiń Qytaıdyń táýelsiz nesıe reıtıngin «A1» deńgeıinde saqtap qalý týraly sheshimi el ekonomıkasynyń oń dınamıkasynda degen senimniń aıǵaǵy ekenin málimdedi.

Mınıstrliktiń málimdeýinshe, ótken jyldyń tórtinshi toqsanynan beri el bıligi keshendi makroekonomıkalyq retteý sharalaryn qabyldaǵan. Sonyń nátıjesinde ekonomıkalyq kórsetkishter jaqsaryp, naryqtyń boljaly men senimi nyǵaıyp, qaryzdyń orta jáne uzaq merzimdi turaqtylyǵy arta túsken. Moody’s-tiń sheshimi osy oń úderisti rastaýdyń kórinisi sanalady.

Málimdemede sondaı-aq kelesi kezeńde engiziletin birqatar jańa saıasat pen qoldanystaǵy sharalardyń ózara árekettesip, el ekonomıkasynyń joǵary sapaly damýy úshin berik negiz qalaıtyny atap kórsetildi.

Buǵan deıin Qytaı bıliginiń el tarıhyndaǵy eń qymbat sý arnasyn salýǵa daıyndalyp jatqanyn jazǵan edik.