Moody's Qazaqstannyń kredıttik reıtıngin Baa1 deńgeıinde rastady
ASTANA. KAZINFORM – Moody's halyqaralyq reıtıng agenttigi Qazaqstan Respýblıkasynyń egemendi kredıttik reıtıngin «Baa1» deńgeıinde rastady. Boljam – «Turaqty», dep habarlaıdy Ulttyq ekonomıka mınıstrligi.
Agenttik reıtıngtiń rastalýyn Qazaqstannyń kúshti fıskaldyq ustanymymen baılanystyrady. Oǵan memlekettik boryshtyń tómen deńgeıi, boryshqa qyzmet kórsetý qabiletiniń joǵary bolýy jáne jınaqtalǵan valıýtalyq aktıvter qoldaý kórsetip otyr.
Moody's baǵalaýynsha, bul faktorlar ekonomıkalyq saıasattyń ıkemdiligin saqtaýǵa jáne syrtqy ekonomıkalyq kúızelisterdiń saldaryn azaıtýǵa múmkindik beretin eleýli qaýipsizdik qoryn qamtamasyz etedi.
Munaı óndirý kóleminiń tómendeýine qaramastan, Qazaqstan ekonomıkasynyń ósimi jalǵasyp otyr. Agenttik buǵan óńdeýshi ónerkásip, qurylys, kólik jáne basqa da munaı emes sektorlardyń JІÓ ósimine qosqan úlesi áser etkenin atap ótti.
– Tsıfrlyq, kólik jáne energetıkalyq ınfraqurylymǵa júrgizilip jatqan ınvestıtsııalar orta merzimdi ekonomıkalyq ósimdi odan ári qoldaıdy. Shıkizattyq emes sektorlar ósýdiń negizgi draıverleri bolyp qala beredi, – delingen málimette.
Moody's pikirinshe, salyq reformalary bıýdjettiń munaı emes kiris bazasyn keńeıtý arqyly fıskaldyq turaqtylyqty nyǵaıtýǵa yqpal etedi.
Sonymen qatar ekonomıkany ártaraptandyrý, salyq reformasy jáne tsıfrlyq, kólik pen energetıkalyq ınfraqurylymǵa salynatyn ınvestıtsııalar eldiń fıskaldyq perspektıvalaryn jaqsartyp, ekonomıkanyń odan ári ósýine múmkindik beredi.
Aıta keteıik, buǵan deıin Kazinform Moody's agenttiginiń Qazaqstan reıtıngin «Baa2»-den «Baa1»-ge deıin kótergenin jazǵan bolatyn.
